ব্যৱহাৰ কৰা চাহপাত খিনি পেলাই দিয়ে নেকি? পেলাই নিদি লগাব পাৰে এইবোৰ কামত

চাহ খোৱাৰ অভ্যাস প্ৰায় সকলোৰে আছে।

নিজে পান কৰাৰ কথাতো বাদেই আলহী-অতিথি আহিলেও চাহেৰে আপ্যায়ন কৰাৰ পৰম্পৰা প্ৰায় সকলো পৰিয়ালতে আছে।

সেয়ে ঘৰ এখনত দিনটোত কিমান বাৰ চাহ কৰিবলগীয়া হয় তাৰ কোনো হিচাপ নাথাকে।

চাহ পানৰ ক্ষেত্ৰত অসমো পিছ পৰি থকা ৰাজ্য নহয়। কাৰণ অসম চাহৰ বাবেই বিখ্যাত।

যি কি নহওক,চাহ কৰাৰ পিছত আপুনি অৱশিষ্ট চাহপাত খিনি পেলাই দিয়ে নেকি?

যদি পেলাই দিয়ে তেন্তে এতিয়াৰে পৰা পেলনীয়া চাহপাত খিনিৰেও যে বহু কিবা কিবি কৰিব পাৰে সেয়া জানি লওক।

তেতিয়া অন্ততঃ পেলনীয়া চাহপাত খিনিৰ সঠিক ব্যৱহাৰো হ’ব আৰু কেইটামান বিশেষ কামো সহজ হৈ পৰিব।

পেলনীয়া চাহপাত খিনি আপুনি এনেবোৰ কামত ব্যৱহাৰ কৰিব পাৰে—

• বাচনত প্ৰায়ে সহজে নুগুচা তেল-চিকতিৰ দাগ লাগে।বহু কষ্ট কৰিও সেই দাগ আঁতৰ কৰাটো কঠিন হৈ পৰে। এই ক্ষেত্ৰত আপোনাক সহায় কৰিব পাৰে পেলনীয়া চাহপাত খিনিয়ে। পেলনীয়া চাহপাত খিনি নিশাটো গৰম পানীত জুবুৰিয়াই ৰাখক।পুৱা চাহপাত খিনি পেলাই দি সেই পানীৰে বাচন ধুলে বাচনৰ পৰা তেল চিকতিৰ দাগ সহজে আঁতৰি যাব।

• পুৰণি আচবাব বিশেষকৈ কাঠৰ আচবাব আদি সময়ৰ লগে লগে লেতেৰা হৈ পৰে। পুৰণি আচবাবৰ দাগ আঁতৰাবলৈ পেলনীয়া চাহপাত ব্যৱহাৰ কৰিব পাৰে। ইয়াৰ বাবে পেলনীয়া চাহপাত মিহলি কৰা পানীৰ পৰা চাহপাত খিনি চেকি সেই পানীৰে আচবাব মচিলে আচবাব পুনৰ চিকচিকিয়া হৈ পৰিব।

• ঘৰতে কৰা শাক-পাচলি,ফুলৰ গুৰিত পেলনীয়া চাহপাতৰ পানী দিলে পাচলি আৰু ফুলে পুষ্টি লাভ কৰিব আৰু সোনকালে বাঢ়িবলৈ ধৰিব।