ঘৰত সোমাল চোৰ; ACৰ ঠাণ্ডা বতাহ পাই মালিকৰ বিচনাৰ তলতে পৰিল শুই

লক্ষ্যভ্ৰষ্ট হ’ল চোৰ। অন্ধ্ৰ প্ৰদেশৰ গোদাবৰী জিলাৰ এই ঘটনাই স্বাভাৱিকতে আপোনাৰ মনত হাঁহি বিৰিঙাই তুলিব।

ৰাজ্যখনৰ গোদাবৰী জিলাৰ গোকবাৰম গাঁৱৰ ২১বছৰীয়া সুৰী বাবুৱে ইয়াৰ ছত্তী ভেংকট ৰেড্ডীৰ ঘৰত চোৰ কৰাৰ পৰিকল্পনা ৰচনা কৰে।

ছত্তী ভেংকট ৰেড্ডী এটা পেট্ৰ’ল পাম্পৰ মালিক। চোৰটোৱে ঘৰটোত ভাল টকা-পইচা পোৱাৰ আশাৰে প্ৰৱেশ কৰে।

ঘৰ লুট কৰাৰ মানসেৰে ঘৰটোত প্ৰৱেশ কৰে যদিও চোৰটোৱে ভিতৰত এয়াৰ কণ্ডিশ্যনৰ শীতল বতাহ পাই শুই পৰে আৰু যেতিয়া চকু মেলে তেতিয়া নিজকে আৰক্ষীৰ জিম্মাত আৱিষ্কাৰ কৰে।

সেয়াই নহয়, কৰ’নাৰ আশংকাৰ প্ৰতি লক্ষ্য ৰাখি অভিযুক্ত সুৰী বাবুৱে মুখত মাস্ক পৰিধান কৰিয়েই চোৰ কৰিবলৈ ঘৰত প্ৰৱেশ কৰে।

চোৰটোৱে জানিবলৈ দিয়া মতে বিগত কিছুদিন ধৰি তেওঁ ঘৰটোৰ মালিকৰ দৈনন্দিন কামকাজ নিৰীক্ষণ কৰি আছিল।

তেওঁ ভাৱিছিল যে তেওঁ ধৰা নপৰিব। পৰিকল্পনা অনুসৰি, সুৰীয়ে ১২ছেপ্টেম্বৰত ঘৰটোত প্ৰৱেশ কৰে আৰু সেই সময়ত গভাৰ নিদ্ৰাত থকা মালিক ৰেড্ডীৰ বেডৰুমত সোমায়।

অভিযুক্ত সুৰীয়ে জানিবলৈ দিয়ে যে সিদিনা তেওঁ দিনভৰ কাম কৰি ক্লান্ত হৈ আছিল আৰু যেতিয়া হঠাৎ ৰুমটোত এয়াৰ কণ্ডিশ্যনৰ ঠাণ্ডা বতাহ পায় বহুত জোৰকৈ টোপনি আহি যায়। তেতিয়া তেওঁ মালিক ৰেড্ডীৰ পালেঙৰ তলত অলপ আৰাম কৰি লোৱাৰ কথা চিন্তা কৰে।

কিন্তু অতি সোনকালেই চোৰৰ নাকৰ শব্দত মালিকৰ টোপনি ভাঙি যায়।

মালিকে লাহেকৈ বাহিৰলৈ ওলাই আহি বাহিৰৰ পৰা ৰুমটো বন্ধ কৰি দিয়ে আৰু আৰক্ষীক খৱৰ দিয়ে।

ৰাতিপুৱা প্ৰায় আঠ বজাত আৰক্ষী আহি অভিযুক্ত সুৰী বাবুক টোপনিৰ পৰা জগাই গ্ৰেপ্তাৰ কৰি লৈ যায়।

জেৰাত চোৰটোৱে জানিবলৈ দিয়ে যে তেওঁ এখন মিঠাইৰ দোকানত সৰুসুৰা কাম কৰি চলি আছিল। কৰ’নাৰ লকডাউনৰ বাবে অভাৱত দিন কটাইছে।

তেওঁ প্ৰথমবাৰৰ বাবে কোনো চুৰি কাৰ্যত প্ৰবৃত্ত হ’ব বিচাৰিছিল যদিও টোপিনয়ে তেওঁৰ বাবে কাল হ’ল।