‘কৃষক মুক্তি, ৭০ সংগঠন আৰু কা বিৰোধী ছাত্ৰ সংগঠনে এসপ্তাহৰ ভিতৰত দল গঠনেৰে দিব ভাল খবৰ’

আজি ২০ ছেপ্তেম্বৰ। আজিৰ দিনটোলৈকে নতুনকৈ গঠন হোৱা আঞ্চলিক ৰাজনৈতিক দল অসম জাতীয় পৰিষদৰ সিদ্ধান্তলৈ অপেক্ষা কৰিলে কৃষক মুক্তি সংগ্ৰাম সমিতিয়ে।

কিন্তু বৰ্তমানলৈকে কোনোধৰণৰ ফল নহাত এতিয়া ৭০ টাকৈ জাতীয় জনগোষ্ঠীয় সংগঠন, কা বিৰোধী ছাত্ৰ সমাজ, শিল্পীসমাজৰ বিশেষ একাংশক লগত লৈ এসপ্তাহৰ ভিতৰত দল গঠনৰ সিদ্ধান্ত গ্ৰহণ কৰিছে কৃষক মুক্তি সংগ্ৰাম সমিতিয়ে।

কৃষক মুক্তি সংগ্ৰাম সমিতিৰ কাৰ্যালয়ত সম্বোধন কৰা সংবাদমেলত সংগঠনটোৰ সভাপতি ভাস্ক’ ডি শইকীয়াই কয় ‘ইতিমধ্যে কৃষক মুক্তি সংগ্ৰাম সমিতিয়ে ৰাজনৈতিক দল গঠনৰ বাবে আগবাঢ়িছো। বিভিন্ন জাতীয় সংগঠন, জনগোষ্ঠীয় সংগঠন, সকলো আঞ্চলিক শক্তি, প্ৰগতিশীল মানুহ, জাতীয়তাবাদী মানুহৰ লগত আলাপ আলোচনা চলাই আছো। ছেপ্তেম্বৰ মাহৰ ভিতৰতে দল গঠনৰ কাম আৰম্ভ কৰা হ’ব। এসপ্তাহৰ ভিতৰতে অসমৰ ৰাইজে ভাল খবৰ পাব।‘

ইপিনে, যদিও সঁহাৰি লাভ কৰা নাই তেন্তে কৃষক মুক্তি সংগ্ৰাম সমিতি এতিয়াও আশাবাদী যে সকলো আঞ্চলিক শক্তি ঐক্যবদ্ধ হ’ব।

‘এটা দল এটা প্ৰতীক বা এখন পতাকাৰ তললৈ নাহিলেও বিজেপি বিৰোধী সকলো আঞ্চলিক শক্তি এখন মঞ্চৰ তললৈ আহিব লাগিব।‘ ৰাজনৈতিক ভাৱে একত্ৰিত হোৱাৰ ইংগিত দি শইকীয়াই এইদৰে কয়।

ইপিনে, এই সংবাদমেলৰ পাছতে এই সন্দৰ্ভত অনুসুচিত জাতি যুৱ ছাত্ৰ পৰিষদৰ সভাপতি ৰুবুল দাসে নৰ্থ ইষ্ট নাওৰ সাংবাদিকৰ আগত কয় ‘অহা ২২ ছেপ্তেম্বৰৰ দিনা ৰাজনৈতিক দল গঠনৰ সন্দৰ্ভত এক বৈঠক অনুষ্ঠিত হ’ব। বিজেপিক উৎখাত কৰিবলৈ সকলো শক্তি একত্ৰিত হৈ নিৰ্বাচন খেলিব লাগিব।‘

‘‘কা’ আইনখনৰ প্ৰতিবাদ কল্পে আঞ্চলিকতাবাদী শক্তিৰ উত্থান হৈছে, গতিকে ইয়াত কোনো দলে কোনো দলক একাষৰীয়া কৰা, কাৰোবাক লগত লৈ যোৱা বিষয়টো নিশ্চয়কৈ উত্থাপন হ’ব নোৱাৰে।‘ তেওঁ লগতে কয়।

ইয়াৰোপৰি তেওঁ কয় ‘অন্তঃকৰণে এটা কথাই কামনা কৰো অসম জাতীয় পৰিষদেই হওঁক বা ৭০ সংগঠনৰ প্ৰস্তাৱিত ৰাজনৈতিক দল বা সকলো দল একত্ৰিত হৈ বিজেপিক প্ৰতিহত কৰিব লাগিব। ইয়াত কাৰোবাক এৰা ধৰাৰ প্ৰসংগটো আহিলেই বিসংগতি আহি পৰিব।‘

ইপিনে, আজিৰ দিনটোতে টাইপাৰ কাৰ্যকৰী সভাপতিৰ দায়িত্ব এৰাৰ সিদ্ধান্ত ল’লে লোহিত গগৈয়ে। ৭০ সংগঠনৰ প্ৰস্তাৱিত ৰাজনৈতিক দলৰ দায়িত্ব তথা অংশ লোৱাৰ বাবেই টাইপা এৰাৰ সিদ্ধান্তৰ কথা উৰ্দ্ধতম কতৃপক্ষক অৱগত কৰা হৈছেবুলি নৰ্থ ইষ্ট নাওৰ সাংবাদিকক জনোৱাৰ লগতে আনুষ্ঠানিকভাৱে দুই এদিনতে পদত্যাগ কৰিব বুলি ঘোষণা কৰে।

তেওঁ লগতে কয় ‘কৃষক মুক্তি সংগ্ৰাম সমিতিৰ উদ্যোগত ৭০ সংগঠনৰ নেতৃত্বত এই ৰাজনৈতিক দল গঠন হ’ব। কা-বিৰোধী ছাত্ৰ সমাজ, শিল্পী সমাজৰ অংশবিশেষৰ উমৈহতীয়া প্ৰচেষ্টাত ঐক্যৱদ্ধ ৰাজনৈতিক দল গঠনৰ সিদ্ধান্ত লোৱা হৈছে। ৩০ ছেপ্তেম্বৰৰ ভিতৰত গঠন হ’ব এই নতুন ৰাজনৈতিক দল।‘

‘নতুনকৈ গঠন হোৱা ৰাজনৈতিক দলে সিদ্ধান্ত ল’ব অসম জাতীয় পৰিষদৰ সৈতে মিত্ৰতা হোৱাৰ প্ৰসংগত। আঞ্চলিক শক্তিসমূহ একত্ৰিত হ’বই লাগিব। আঞ্চলিক শক্তি বহুদাবিভক্ত হ’লে মূৰকত গৈ শাসক পক্ষ লাভৱান হ’ব। আমি বিভাজনৰ পক্ষত নাই। যিকোনো ত্যাগৰ বিনিময়ত কেৱল অসম জাতীয় পৰিষদেই নহয়, আঁতৰি থকা আঞ্চলিক গণ মৰ্চাকে ধৰি সকলো আঞ্চলিকতাবাদী শক্তি একত্ৰিত হোৱাটো কামনা কৰো।‘ তেওঁ লগতে কয়।

যদি তেওঁলোকৰ এই প্ৰস্তাৱ নতুনকৈ গঠন হোৱা আঞ্চলিক ৰাজনৈতিক শক্তি AJP য়ে মানি লয় বা ৰাজনৈতিকভাৱে মিত্ৰতাৰ সিদ্ধান্ত লয় তেন্তে ২১ৰ ৰাজনীতিত এটা ধুমুহা অহাটো নিশ্চিত।