এবাৰ ডেংগুত আক্ৰান্ত হোৱাসকল কোভিডত আক্ৰান্ত হোৱাৰ আশংকা কম : ব্ৰাজিলৰ গৱেষকৰ দাবী

ক’ৰ’ণাৰ দৰে বিশ্বত প্ৰতি বছৰে আতংকৰ সৃষ্টি কৰি অহা ডেংগুত যিসকল লোক এবাৰ আক্ৰান্ত হৈছে  তেওঁলোক ক’ৰ’ণা ভাইৰাছৰ দ্বাৰা আক্ৰান্ত হোৱাৰ আশংকা বহু গুণে কম।

এই দাবী কৰিছে ব্ৰাজিলৰ একাংশ গৱেষকে।

ক’ৰ’ণা ভাইৰাছ সংক্ৰমণৰ ক্ষেত্ৰত বিশ্বৰ ভিতৰতে তৃতীয় স্থানত থকা ব্ৰাজিলৰ যি কেইখন প্ৰদেশত ২০১৯-২০ চনত ডেংগুৰ  সংহাৰ বেছিকৈ হৈছে সেই প্ৰদেশ কেইখনত ক’ৰ’ণা ভাইৰাছত আক্ৰান্ত লোকৰ সংখ্যা বহু গুণে কম  হোৱা দেখা গৈছে।

ব্ৰাজিলৰ চাও পাউল’ বিশ্ব বিদ্যালয় আৰু ডিউক বিশ্ব বিদ্যালয়ৰ গৱেষকৰ দল এটাই সমীক্ষা চলাই এই কথাৰ  প্ৰমাণ পাইছে যে পূৰ্বে ডেংগুত আক্ৰান্তসকলে ক’ৰ’ণাত তেনেই কমকৈহে আক্ৰান্ত হৈছে।

গৱেষকৰ দলটোৰ মতে ডেংগুৰ পৰা মুক্ত হোৱাৰ পিছত শৰীৰত যি ডেংগুৰ এণ্টিবডিৰ সৃষ্টি হয় সেই এণ্টিবডিয়ে ক’ৰ’ণা ভাইৰাছক শৰীৰত থিতাপি লোৱাত বাধা দিয়ে।

ফলত এবাৰ ডেংগুত আক্ৰান্ত সকলে ক’ৰ’ণাত আক্ৰান্ত হোৱাৰ আশংকা বহু খিনি কমি যায় বুলি গৱেষকৰ দলটোৱে মন্তব্য কৰিছে।

উল্লেখ্য ব্ৰাজিলৰ গৱেষকে কোৱাৰ পূৰ্বেই চলিত বৰ্ষৰ জুন মাহত ইণ্ডিয়ান ইনষ্টিটিউট অৱ  কেমিকেল বায়’লজিৰ গৱেষক শুভজিৎ বিশ্বাসেও কৈছিল যে এবাৰ ডেংগু হোৱা সকলৰ ক্ষেত্ৰত ক’ৰ’ণাত আক্ৰান্ত হোৱাৰ আশংকা কমি যায়।

অৱশ্যে সেই সময়ত তেওঁ কোৱা কথাকলৈ কোনো চৰ্চা হোৱা নাছিল।