কানাডাৰ মেকটেক পাৰ্কত ক্লিফ ডাইভিং কৰিবলৈ গৈ ৰহস্যজনকভাবে মৃত্যু অসমীয়া ছাত্ৰৰ

কানাডাৰ প্ৰখ্যাত মেকটেক পাৰ্কত ক্লিফ ডাইভিং কৰিবলৈ গৈ ৰহস্যজনক ভাবে মৃত্যুক সাৱটি লৈছে অসমৰ এগৰাকী ছাত্ৰই।

কানাডাৰ ছেণ্ট থমাছ বিশ্ববিদ্যালয়ত ৰাজনীতি বিজ্ঞান বিষয়ত অধ্যয়নৰত  ২২ বছৰীয়া অৰণ্যম ৱৰা (এৰি বৰা) ই মেকটেক পাৰ্কলৈ আন লগৰীয়াৰ সৈতে ফুৰিবলৈ গৈছিল আৰু বিয়লিৰ ভাগত ছাত্ৰজনে পাৰ্কৰ জলাশয়ত সাঁতুৰিবলৈ পানীত জঁপিয়াইছিল।

কিছুসময় পিছতেই অৰণ্যমক পানীৰ মাজত মৃত অৱস্থাত উদ্ধাৰ কৰা হৈছিল।

বডি বিল্ডাৰ হিচাবে বিশ্ববিদ্যালয় খনত সুনাম অৰ্জন কৰা অৰণ্যমৰ ঘৰ গুৱাহাটীত বুলি জানিব পৰা গৈছে।তেওঁ কানাডাৰ ফ্ৰেডাৰিকটনত বাস কৰিছিল।

অৰণ্যমৰ মৃত্যু সন্দৰ্ভত তেওঁৰ এগৰাকী বান্ধৱীয়ে ছ’চিয়েল মিডিয়াত এটা প’ষ্ট কৰা পৰিলক্ষিত হৈছে।

বান্ধৱী মিল্লি কুইৰেছৰ প’ষ্টটোৰ  ভিত্তিত আন্তঃৰাষ্ট্ৰীয় সংবাদ মাধ্যমত অৰণ্যমৰ মৃত্যুৰ বাতৰিটো প্ৰকাশ পাইছে।

চিবিচিয়ে প্ৰকাশ কৰা বাতৰি অনুসৰি বুধবাৰে বিয়লি অৰণ্যমৰ সলিল সমাধি ঘটিছিল।

ইপিনে অৰণ্যমৰ মৃত্যুক সহজ ভাবে ল’ব পৰা নাই তেওঁৰ বান্ধৱী মিল্লিৰ লগতে আন বন্ধু সকলে।

মিল্লিৰ মতে সাঁতুৰিবলৈ জনা অৰণ্যম কিদৰে পানীত বুৰ গ’ল সেয়াহে ৰহস্যৰ বিষয়।

মিল্লিয়ে সেয়ে ঘটনাটোৰ ৰহস্য উদ্ঘাটনৰ দাবী জনাইছে।