বিজেপিৰ শীৰ্ষনেতাই চিনি নোপোৱা দিবন ডেকাক বিজেপিৰ প্ৰাথমিক সদস্য পদৰ পৰা নিলম্বন

আৰক্ষী উপ-পৰিদৰ্শক নিযুক্তি পৰীক্ষাৰ প্ৰশ্নকাকত ফাদিল কেলেংকাৰিৰ অন্যতম নায়ক বিজেপি নেতা দিবন ডেকাক বিজেপি দলৰ প্ৰাথমিক সদস্য পদৰ পৰা নিলম্বন কৰা হৈছে।

বৃহস্পতিবাৰে ভাৰতীয় জনতা পাৰ্টি, অসম প্ৰদেশৰ ৰাজ্যিক সাধাৰণ সম্পাদক ডাঃ ৰাজদীপ ৰায়ে জাৰি কৰা এখন পত্ৰত এইকথা সদৰী কৰা হৈছে।

পত্ৰখনত কোৱা হৈছে যে বৰ্তমান আৰক্ষী নিযুক্তি প্ৰক্ৰিয়াত সংঘটিত হোৱা উত্থাপিত দুৰ্নীতিৰ অভিযোগৰ পৰিপ্ৰেক্ষিতত বিজেপিৰ ৰাজ্যিক সভাপতি ৰনজিৎ কুমাৰ দাসে দলৰ যদি কোনো কাৰ্যকতা জড়িত আছে তেওঁৰ বিৰুদ্ধে কঠোৰ পদক্ষেপ গ্ৰহণ কৰাৰ বাবে গৃহ বিভাগক আবেদন জনোৱাৰ পাছত মুখ্য মন্ত্ৰীৰ নিৰ্দেশত গৃহ বিভাগে দিবন ডেকাক গ্ৰেপ্তাৰ কৰিবলৈ সক্ষম হৈছে।

সেয়েহে, দলৰ ৰাজ্যিক সভাপতি ৰনজিৎ কুমাৰ দাসে দিবন ডেকাক তাৎক্ষনিকভাৱে বলবৎ হোৱাকৈ দলৰ প্ৰাথমিক সদস্যৰ পৰা নিলম্বন কৰিছে।

উল্লেখ্য যে আৰক্ষীৰ নিযুক্তি প্ৰক্ৰিয়াত সংঘটিত কেলেংকাৰিৰ অন্যতম অভিযুক্ত বিজেপি নেতা দিবন ডেকাই বুধবাৰে নিশা আত্মসমৰ্পন কৰিবলৈ অহাৰ সময়তে পাটাছাৰকুছিৰ পৰা আৰক্ষীয়ে গ্ৰেপ্তাৰ কৰে।

বিজেপি দলৰ সক্ৰিয় কৰ্মী হিচাপে দিবন ডেকাই যোৱা কেইবছৰ ধৰি কামকাজ চলাই অহাৰ পাছতো দলৰ একাংশ শীৰ্ষ নেতাই দিবন ডেকাক চিনি নোপোৱাৰ ভাও জোৰাও দেখা গৈছিল।

কেইদিনমান পূৰ্বে সাংবাদিকে সোধা এক প্ৰশ্নৰ উত্তৰত মন্ত্ৰী হিমন্ত বিশ্ব শৰ্মাই কোন দিবন ডেকা বুলি ওলোটাই প্ৰশ্ন কৰাৰ লগতে তেওঁৰ বিজেপিৰ কাৰ্যালত কোনোদিন দেখা নোপোৱা বুলি উল্লেখ কৰিছিল।

ৰাষ্ট্ৰীয় নেতৃত্বয়ো ভালকৈয়ে চিনি পোৱা দিবন ডেকাৰ কু-কীৰ্তি ঢাকিবলৈ চেষ্টা চলোৱা দলৰ একাংশ শীৰ্ষ নেতাৰ প্ৰচেষ্টা অৱশেষত ব্যৰ্থ হ’ল।

দলে দিবন ডেকাক নিলম্বন কৰাৰ নিৰ্দেশ দি বিজেপিৰ লগত দিবন ডেকাৰ সম্পৰ্কৰ স্বৰূপ স্পষ্ট কৰি দিলে।