বৰপেটাত আৰক্ষীয়ে উদ্ধাৰ কৰিলে বৃহৎ পৰিমানৰ টকা: ৰে’ল কৰ্মচাৰী দেৱৰাজ দাসক আটক

বৰপেটা চহৰত শনিবাৰে পুৱতি নিশা আৰক্ষীয়ে উদ্ধাৰ কৰে এক বৃহৎ পৰিমানৰ টকা ৷

বৰপেটা সদৰৰ উপ আৰক্ষী অধীক্ষক মদন চন্দ্ৰ কলিতাৰ নেতৃত্বত আৰু বৰপেটা সদৰ থানাৰ দ্বিতীয় আৰক্ষী বিষয়া মুকছেদুৰ ৰহমান আৰু বৰপেটা নগৰ উপ পৰিদৰ্শক মুনীন্দ্ৰ দাসৰ সহযোগত আৰক্ষীৰ দলে যোৱা নিশাৰ পৰাই গান্ধীনগৰৰ দেৱৰাজ দাসৰ গৃহত অভিযান চলায় ৷

আৰক্ষীৰ অভিযানত দেৱৰাজ দাসৰ গৃহৰ পৰা বৃহৎ পৰিমানৰ ধন উদ্ধাৰ কৰে ৷

আৰক্ষীয়ে টকা হিচাপ কৰা নাই যদিও দেৱৰাজ দাসৰ গৃহৰ পৰা দুই বেগ টকা জব্দ কৰাৰ লগতে দেৱৰাজ দাসকো আটক কৰে ৷

জব্দ কৰা টকাৰ পৰিমাণ অনুমানিক দুই কোটি হব বুলি জানিব পৰা গৈছে ৷

আটকধীন দেৱৰাজ দাস ভাৰতীয় ৰে’লৱে বিভাগত চাকৰি কৰে ৷ সম্প্ৰতি তেওঁ  বঙাইগাঁওত কৰ্মৰত ৷

আৰক্ষীয়ে এই সন্দৰ্ভত স্পষ্টকৈ কোৱা নাই যদিও বিয়লিৰ ভাগত সংবাদমেলৰ জৰিয়তে সবিশেষ জনাব বুলি উল্লেখ কৰে উপ আৰক্ষী অধীক্ষক মদন চন্দ্ৰ কলিতাই ৷

গান্ধীনগৰৰ পৰা এই বৃহৎ পৰিমাণৰ টকা উদ্ধাৰ কৰাৰ ঘটনাকলৈ স্থানীয় ৰাইজৰ মাজত কৌতুহলৰ সৃষ্টি হৈছে ৷