বিধায়ক ভাস্কৰ শৰ্মাৰ তৎপৰতাত লিডু-মাৰ্ঘেৰিটাত ২০২১ বৰ্ষৰ পৰা আৰম্ভ হ’ব দুখনকৈ আই টি আই

চলিত বৰ্ষৰ ডিচেম্বৰ মাহৰ পৰা পৰা নামভৰ্তি আৰম্ভ হ’ব লিডু আৰু মাৰ্ঘেৰিটাত দুখনকৈ উদ্যোগিক প্ৰশিক্ষণ কেন্দ্ৰত।

লিডুৰ আই টি আইৰ বাবে ৪টা বিভাগৰ বাবে ১৬০খন আসন, মাৰ্ঘেৰিটাৰ ৩টা বিভাগৰ বাবে ১২০খন আসন সদ্যহতে অনুমোদিত হৈছে।

খুব সোনকালে লিডুত আৰু তিনিটা আৰু মাৰ্ঘেৰিটাত দুটা বিভাগ সংযোজিত হ’ব আৰু লগে লগে আসনৰ সংখ্যা বাঢ়িব।

অসম চৰকাৰে ব্যক্তিগত অংশীদাৰিত্বৰে (পি পি পি মোড) ৰাজ্যৰ ২৪ খন আই টি আইলৈ অনুমোদন জনাইছে। ইতিমধ্যে নিবিদা সম্পন্ন হৈছে।

FUTURE VALLEY TECHNELOGIES AND SERVICE L L P নামৰ ব্যক্তিগত প্ৰতিষ্ঠানে নিবিদা লাভ কৰিছে লিডু-মাৰ্ঘেৰিটাৰ আই টি আই দুখনৰ।

উল্লেখযোগ্য যে- কংগ্ৰেছ চৰকাৰৰ আমোলত ২০১১ চনৰ ১২ ফেব্ৰুৱাৰীত লিডুৰ শৈক্ষিক প্ৰতিষ্ঠানটোৰ আধাৰশিলা সেই সময়ৰ মন্ত্ৰী প্ৰদ্যুত বৰদলৈয়ে স্থাপন কৰিছিল।

ইয়াৰ পাছতে লিডুৰ এক বৃহৎ ভূমি খণ্ডত কেইবাকোটি টকা ব্যয় সাপেক্ষে এই প্ৰতিষ্ঠানটো নিৰ্মাণ আৰম্ভ কৰা হয়।

অতি লেহেমীয়া গতিৰে নিৰ্মাণ কাৰ্য চলিলেও অৱশেষত প্ৰায় সম্পূৰ্ণ হৈছিল। কিন্তু কংগ্ৰেছ চৰকাৰৰ শাসন কালত এই শৈক্ষিক প্ৰতিষ্ঠানটোৰ শিক্ষা সেৱা আৰম্ভ নহ’ল।

এইদৰে অৱহেলিত আৰু অনাদৃত হৈ থকা প্ৰতিষ্ঠানটো এৰাবাৰীলৈ পৰিণত হয়। এজাক ধুমুহা বৰষুণত এই শৈক্ষিক প্ৰতিষ্ঠানটো প্ৰায় বিধ্বস্ত হৈ পৰে।

বতাহ ধুমুহাই প্ৰতিষ্ঠানটোৰ শ্ৰেণী কোঠাৰ এক বৃহৎ অংশৰ টিন পাত উৰুৱাই নিয়াৰ ফলত আৰু চিলিং বোৰ কোনো দুস্কৃতিকাৰীয়ে ভাঙি পেলোৱাৰ লগতে বিভিন্ন অংশত ক্ষতিগ্ৰস্ত কৰাৰ ফলত প্ৰায় ধ্বংস স্তুপলৈ পৰিণত হয়।

ব্যক্তিগত অংশীদাৰীত্বৰে হ’লেও- নিজ কাৰ্যকালতে বিধায়ক ভাস্কৰ শৰ্মাই লিডুৰ আই টি আইখন কাৰ্যক্ষম কৰিবলৈ আৰু মাৰ্ঘেৰিটাত অন্য এখন আই টি আই অনুমোদিত কৰিবলৈ সক্ষম হোৱাত বিভিন্নজনে সন্তষ্টি প্ৰকাশ কৰিছে।

বিজেপিৰ মাৰ্ঘেৰিটা ব্লক মণ্ডলৰ সভাপতি ভৱেশ দত্তই আজি সংবাদ মাধ্যমৰ আগত কয় যে প্ৰতিশ্ৰুতি অনুযায়ী বিধায়ক ভাস্কৰ শৰ্মাই লিডুৰ আই টি আইখন সক্ৰিয় কৰিবলৈ আৰু মাৰ্ঘেৰিটাত নতুনকৈ এখন আই টি আই অনুমোদন আনিবলৈ সক্ষম হোৱা বুলি প্ৰকাশ কৰি বৃটিছ আমোলৰ পৰা উদ্যোগিক অঞ্চল হিচাপে পৰিগণিত মাৰ্ঘেৰিটাত সুদীৰ্ঘবছৰ কংগ্ৰেছ দল শাসনত থাকিও এই ক্ষেত্ৰত সফল নোহোৱাৰ কথা উল্লেখ কৰি ইয়াৰ দ্বাৰাই সমষ্টি বাসীৰ প্ৰতি চৰকাৰ বিধায়ক শৰ্মাৰ দ্বায়বদ্ধতা স্পষ্ট কৰে বুলি কয়।

অসম-অৰুণাচল সীমান্তবৰ্তী মাৰ্ঘেৰিটা লিডু আৰু ইয়াৰ উপকণ্ঠ অঞ্চলৰ লগতে চুবুৰীয়া ৰাজ্য অৰুণাচলৰ চাংলাং টিৰাপ জিলাবাসীৰ বাবে এইয়া নিশ্চিত ভাৱে সুখবৰ হিচাপে বিবেচিত হৈছে।

উল্লেখ যে মাৰ্ঘেৰিটা সাংবাদিক সংস্থাৰ লগতে ছাত্ৰ মুক্তি সংগ্ৰাম সমিতি, আছু আৰু যুৱ ছাত্ৰ পৰিষদে উদ্যোগিক প্ৰশিক্ষণ কেন্দ্ৰটো শীঘ্ৰে মুকলিৰ দাবী জনোৱাৰ লগতে সময়ে সময়ে প্ৰতিবাদী কাৰ্যসূচী ৰূপায়ণ কৰি আহিছিল।