গ্ৰীষ্মৰ আৰম্ভণিতেই পৰিষ্কাৰ খোৱা পানীৰ অভাৱে ত্ৰিপুৰাত প্ৰাণ নিলে বহুজনৰ

গ্ৰীষ্ম কালৰ আগমনৰ পৰিপ্ৰেক্ষিতত পৰিষ্কাৰ খোৱা পানীৰ অভাৱে ত্ৰিপুৰাৰ বিভিন্ন অঞ্চলত পানীৰ পৰা উৎপন্ন ৰোগৰ প্ৰাদুৰ্ভাব বৃদ্ধি কৰা দেখা গৈছে।

ৰাজ্যখনৰ কাঞ্চনপুৰ, ধৰ্মনগৰ আদি বিভিন্ন জনজাতি বসতিপ্ৰধান অঞ্চলবোৰত পানীৰ পৰা উৎপন্ন ৰোগে গুৰুতৰ ৰূপ ধাৰণ কৰিছে।

ইয়াৰ ফলত এতিয়ালৈকে ৰাজ্যখনত শিশুকে ধৰি নিচে কমেও ১২ গৰাকী লোকৰ মৃত্যু হৈছে। মৃত্যু হোৱা লোকসকলৰ মাজত এগৰাকী আশা কৰ্মীও আছে বুলি জানিব পৰা গৈছে।

প্ৰাপ্ত তথ্য মতে, পৰিষ্কাৰ খোৱা পানীৰ অভাৱেই ইয়াৰ অন্যতম কাৰণ। উল্লেখযোগ্য যে, উত্তৰ ত্ৰিপুৰা জিলাৰ প্ৰিয়াৰিচাৰা, ব্ৰজেন্দ্ৰ নগৰ, ৰানী বাৰি আদিকে ধৰি বিভিন্ন অঞ্চলৰ লগতে ধৰ্মনগৰৰ কাষৰীয়া গাওঁসমূহ পৰিস্কাৰ খোৱা পানীৰ তীব্ৰ সংকটৰ সন্মুখীন হৈছে। ফলত উক্ত অঞ্চলসমূহত পানীৰ পৰা উৎপন্ন বিভিন্ন ৰোগৰ প্ৰাদুৰ্ভাব দেখা গৈছে।

স্থানীয় লোকসকলে অভিযোগ কৰে যে, সংশ্লিত কৰ্তৃপক্ষই পৰিস্কাৰ খোৱা পানীৰ যোগান নিশ্চিত নকৰাৰ ফলত শতাধিক লোকে গোটেই বছৰজুৰি লেতেৰা পানীকে খাই আহিবলগীয়া হৈছে।