বি পি এফত তীব্ৰ খহনীয়া; তিনি শতাধিক বি পি এফ নেতা-কৰ্মীৰ বিজেপিত যোগদান

বিটিআৰ নিৰ্বাচনক কেন্দ্ৰ কৰি তীব্ৰতৰ হৈ উঠিছে বিজেপি, য়ু পি পি এল, জি এচ পি আদি ৰাজনৈতিক দলৰ নিৰ্বাচনী প্ৰচাৰ।

দল সমূহৰ প্ৰচাৰৰ মাজতে তামুলপুৰত বি পি এফ দলত আৰম্ভ হৈছে তীব্ৰ খহনীয়া।

দেওবাৰে পুনৰ প্ৰায় তিনি শতাধিক বি পি এফ নেতা কৰ্মীয়ে দল ত্যাগ কৰি আনুস্থানিকভাৱে বিজেপি দলত যোগদান কৰে।

দেওবাৰে বিয়লি ৪ বজাত তামুলপুৰ সমষ্টিৰ অন্তৰ্গত গয়বাৰী মণ্ডল বিজেপিৰ কাৰ্যালয় চৌহদত অনুস্থিত এক যোগদান সভাত অংশ গ্ৰহণ কৰি ৰাজ্যিক বিজেপিৰ উপ সভানেত্ৰী ৰেখাৰানী দাস বড়োই কয়, ‘বি টি আৰত এইবাৰ নতুন দিগন্তৰ সূচনা হ’ব। এইবাৰৰ বি টি আৰ নিৰ্বাচন প্ৰত্যাহ্বানৰ নিৰ্বাচন, গণতন্ত্ৰ ৰক্ষাৰ নিৰ্বাচন, সু-শাসন প্ৰতিস্থা কৰাৰ নিৰ্বাচন, অধিকাৰ ৰক্ষাৰ নিৰ্বাচন’।

সভাত ৰেখা ৰাণী বড়োৱে পুনৰ কয়, ‘বিজেপিয়ে সমগ্ৰ বড়ো ভূমিত শান্তি স্থাপন কৰিব বিচাৰে, সুশাসন দিব বিচাৰে। সমগ্ৰ বি টি আৰত এতিয়া বিজেপিৰ সপক্ষে ধুমুহা বলিছে। এই ধুমুহাত হাগ্ৰামাৰ বি পি এফ কেতিয়াও তিষ্ঠি থাকিব নোৱাৰে। এইবাৰ হাগ্ৰামাৰ বিদায় লোৱাৰ সময়। আমি বিচাৰো হাগ্ৰামাই সন্মান সহকাৰে বিদায় লওক’।

‘হাগ্ৰামা এতিয়া নিসংগ ৷ মহিলাৰীৰ সোঁহাত-বাওঁহাত স্বৰূপ বিশ্বজিৎ দৈমাৰী আৰু ইমানুৱেল মুছাহাৰী এতিয়া হাগ্ৰামাৰ সংগ এৰিলে। দুয়ো গৰাকী নেতাই অচিৰেই বিজেপি দলত যোগদান কৰিব আৰু তামুলপুৰ সমষ্টিত এক নতুন মাত্ৰা প্ৰদান কৰিব। বি টি আৰবাসীয়ে এতিয়া বিজেপিক আদৰিবলৈ প্ৰস্তুতি আৰম্ভ কৰিছে। বিজেপি দলত যোগদান কৰিবলৈ এতিয়া বি টি আৰবাসীয়ে হেতা ওপৰা লাগাইছে’, এই মন্তব্য ৰেখা ৰাণী দাস বড়োৰ।

ৰেখাৰাণী দাস বড়োয়ে লগতে গয়বাৰী সমষ্টিৰ প্ৰাৰ্থী চণ্ডী বসুমতাৰীক সমালোচনা কৰি কয় যে চণ্ডীয়ে এইবাৰ চণ্ডী পূজা কৰিও উদ্ধাৰ হ’ব নোৱাৰে।

বিজেপিৰ যোগদান সভাত অংশ গ্ৰহণ কৰি বাক্সা জিলা বিজেপিৰ প্ৰভাৰী জয়ন্ত দাসে কয়, ‘বি টি আৰবাসীয়ে এতিয়া কেৱল  পৰিবৰ্তন বিচাৰে ৷ বিটিআৰ নিৰ্বাচনত বিজেপিয়ে এইবাৰ চৰকাৰ দখল কৰাটো খাটাং। গয়বাৰী সমষ্টিৰ বিজেপিৰ প্ৰাৰ্থী হেমন্ত কুমাৰ ৰাভাই অভিলেখ সংখ্যক ভোট লাভ কৰি জয়ী হ’ব’।

গয়বাৰী মণ্ডল বিজেপিৰ সভাপতি হৰেন্দ্ৰনাথ ৰাভাৰ সভাপতিত্বত অনুস্থিত আজিৰ যোগদান সভাত গয়বাৰী ব্লক বি পি এফৰ সাধাৰণ সম্পাদক জাৰমল ব্ৰহ্ম, শুকুৰ সিং ব্ৰহ্ম, জনক ব্ৰহ্মৰ নেতৃত্বত প্ৰায় তিনি শতাধিক গয়বাৰী ব্লক বি পি এফ নেতা কৰ্মীয়ে আনুস্থানিকভাৱে বিজেপি দলত যোগদান কৰে।

যোগদান সভাত বাক্সা জিলা বিজেপিৰ সভাপতি ৰাম দাহাল, সম্পাদক  ৰাজেশ বড়ো, বাক্সা জিলা মহিলা বিজেপিৰ সভানেত্ৰী ভানু মজুমদাৰ, গয়বাৰী পৰিষদীয় সমষ্টিৰ বিজেপি প্ৰাৰ্থী হেমন্ত কুমাৰ ৰাভাৰ লগতে কেইবাজনো নেতা কৰ্মী উপস্থিত থাকে ৷