এয়া কি? শুনানিৰ সময়ত খালী গা’ৰে অধিবক্তা! ক্ষুব্ধ উচ্চতম ন্যায়ালয়

উচ্চতম ন্যায়ালয়ত ভাৰ্চুৱেল শুনানিৰ সময়ত হঠাতে এগৰাকী অধিবক্তাক খালী গা’ৰে বহি থকা দেখি ক্ষুব্ধ হৈ পৰিল সৰ্বোচ্চ আদালত।

উচ্চতম ন্যায়ালয়ে কয় যে ভাৰ্চুৱেলি কামকাজ চলি থকা আঠমাহ হৈ যোৱাৰ পাছতো অধিবক্তাসকল ইমান অসতৰ্ক হৈ আছে কিয়?

মঙলবাৰে ন্যায়াধীশ এল এল ৰাওৰ বিচাৰপীঠত কোভিড সম্পৰ্কীয় এটা গোচৰৰ শুনানিৰ সময়ত হঠাতে এজন লোকক খালী গা’ৰে কেৰালাৰ অধিবক্তা জি প্ৰকাশৰ কেমেৰা ঠিক কৰি থকা দেখা যায়। বিষয়টো লগে লগেই উচ্চতম ন্যায়ালয়ৰ দৃষ্টিগোচৰ হয়।

বিপৰীতে, অধিবক্তাগৰাকীৰ ফালৰ পৰা কোনো সঁহাৰি অহা নাই। জানিব পৰা মতে, খালী গা’ৰে থকা লোকজনে এগৰাকী অধিবক্তা আৰু তেওঁৰ নাম এম এল জিষ্ণু। তেওঁ অধিবক্তা প্ৰকাশৰ এগৰাকী আত্মীয়।

এই ঘটনাত অত্যন্ত ক্ষুব্ধ হৈ পৰে সৰ্বোচ্চ আদালত। বিচাৰপীঠখনে আদালতত ভাৰ্চুৱেল কামকাজৰ আঠমাহ হৈ যোৱাৰ পাছতো অধিবক্তাসকল সতৰ্ক নোহোৱাটোত ক্ষোভ ব্যক্ত কৰে।

উল্লেখ্য যে যোৱা অক্টোবৰতো উচ্চতম ন্যায়ালয়ত ন্যায়াধীশ চন্দ্ৰচুড়ৰ বিচাৰপীঠত এগৰাকী অধিবক্তাই পোছাক নিপিন্ধাকৈ কেমেৰাৰ সন্মুখলৈ আহিছিল। সেইবাৰো ন্যায়ধীশগৰাকীয়ে তীব্ৰ ক্ষোভ ব্যক্ত কৰিছিল।