মেঘালয়ৰ মুখ্য মন্ত্ৰী কনৰাড চাংমা কোভিড প’জিটিভ

মেঘালয়ৰ মুখ্য মন্ত্ৰী কনৰাড চাংমাৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।

মুখ্য মন্ত্ৰী চাংমাই টুইটাৰযোগে তেওঁ কোভিড প’জিটিভ হোৱা বুলি জানিবলৈ দিয়ে।

‘‘পৰীক্ষাত কোভিড-১৯ প’জিটিভ হৈছো। মি বৰ্তমান হোম আইছ’লেশ্যনত আছো আৰু মোৰ শৰীৰত কোভিডৰ সাধাৰণ লক্ষণে দেখা দিছে। মই বিগত পাঁচ দিনৰ ভিতৰত যিসকল লোকে মোৰ সংস্পৰ্শলৈ আহিছে তেওঁলোকে নিজৰ স্বাস্থ্যৰ ওপৰত নজৰ ৰাখক আৰু প্ৰয়োজন হ’লে কোভিড পৰীক্ষা কৰক,’’  মুখ্য মন্ত্ৰী কনৰাড চাংমাই টুইটাৰ যোগে এইদৰে উল্লেখ কৰে।

আনহাতে, মেঘালয়ৰ স্বাস্থ্য বিভাগৰ তৰফৰ পৰাও মুখ্য মন্ত্ৰী চাংমা কোভিড প’জিটিভ হোৱা বুলি আনুষ্ঠানিকভাৱে সদৰী কৰে।

উল্লেখযোগ্য যে, মেঘালয়ত বৰ্তমানলৈ মুঠ ১২৫১১ গৰাকী ব্যক্তি কোভিড প’জিটিভ হোৱাৰ বিপৰীতে চিকিৎসাৰ অন্তত ১১৮৫৫ গৰাকী ব্যক্তি ক’ৰ’না মুক্ত হৈ সম্পুৰ্ণ সুস্থ হৈ উঠিছে।

মেঘালয়ত বৰ্তমান ৫৩৪ গৰাকী সক্ৰিয় কোভিড ৰোগী আছে আৰু এতিয়ালৈ ১২২ গৰাকী ব্যক্তিয়ে ৰাজ্যখনত কোভিডৰ সংক্ৰমণৰ ফলত প্ৰাণ হেৰুৱাইছে।