মহিলা খেলুৱৈক নিৰন্তৰ বলাৎকাৰ অৰ্জুন বঁটা বিজয়ী চিআৰপিএফ বিষয়াৰ! থানাত গোচৰ ৰুজু

এগৰাকী ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত সুখ্যাতি অৰ্জন কৰা মহিলা খেলুৱৈক বলাৎকাৰ কৰাৰ অভিযোগে এতিয়া দেশত প্ৰতিক্ৰিয়াৰ সৃষ্টি কৰিছে।

৩০ বছৰীয়া খেলুৱৈ গৰাকীয়ে চিআৰপিএফত চাকৰি কৰি আছে দিও বাহিনীটোৰ একাংশ শীৰ্ষ বিষয়াই তেওঁক সুখত চাকৰি কৰিবলৈ দিয়া নাই।

মহিলা খেলুৱৈ গৰাকীয়ে অভিযোগ কৰা অনুসৰি চিআৰপিএফৰ বিষয়া খজন সিং আৰু বাহিনীটোৰ আন এগৰাকী বিষয়া সুৰজিৎ সিঙে তেওঁক বলাৎকাৰ কৰি আহিছে।

তাৎপৰ্যপূণ কথাটো হ’ল বিষয়া খজন সিং এগৰাকী অৰ্জুন বঁটা বিজয়ী খেলুৱৈ।

ছিউলত অনুষ্ঠিত এছিয়ান গেমছত খজন সিঙে সাঁতোৰত ৰূপৰ পদক অৰ্জন কৰিবলৈ সক্ষম হৈছিল।

ইয়াৰ পুৰস্কাৰ স্বৰূপে খজন সিঙে চিআৰপিএফৰ উচ্চ পদবীত অধিষ্ঠিত হৈছিল।চিআৰপিএফত কনিষ্টবল পদত নিযুক্ত গৰাকী মহিলা খেলুৱৈ গৰাকীয়ে প্ৰকাশ কৰা মতে বাহিনীটোৰ মহিলা কনিষ্টবলসকলক এই দুই বিষয়াই বলপূৰ্বক যৌন নিৰ্যাতন চলাই গৈছে।

আনকি তেওঁকো নতুন দিল্লীৰ বসন্তকুঞ্জৰ এটা ফ্লেটত তিনি দিন ধৰি বন্দী কৰি ৰাখি বিষয়া খজন সিঙে বলাৎকাৰ কৰিছিল বুলি মহিলা খেলুৱৈ গৰাকীয়ে গুৰুতৰ অভিযোগ উত্থাপন কৰিছে।কেৱল সেয়াই নহয় প্ৰায়েই তেওঁ বলাৎকাৰৰ বলি হৈ আহিছে।

ইতিমধ্যে মহিলা খেলুৱৈগৰাকীৰ পিতৃয়ে দিল্লীৰ হৰিদাস নগৰ থানাত বিষয়া দুজৰ বিৰুদ্ধে গোচৰ তৰিছে।

মহিলা খেলুৱৈ তথা চিআৰপিএফৰ কনিষ্টবল গৰাকীক বলাৎকাৰ কৰাৰ ঘটনাই এতিয়া কঁপনিৰ সৃষ্টি কৰিছে বাহিনীটোত।চিআৰপিএফে এই ঘটনাৰ তদন্ত কৰিবলৈ এখন সমিতি গঠন কৰি দিছে।