বিশ্বনাথত দুজন চোৰাং চিকাৰীক আটক, জব্দ বহু সামগ্ৰী

শনিবাৰে নিশা বিশ্বনাথ বন্য প্ৰাণী সংমণ্ডলৰ অধীনস্থ কেন্দ্ৰীয় বনাঞ্চলিক কাৰ্যালয়ৰ এটা বৃহৎ দলে গোপন তথ্যৰ পম খেদি আটক কৰিবলৈ সক্ষম হয় দুজনকৈ দুধৰ্ষ চোৰাং চিকাৰীক।

দুধৰ্ষ চোৰাং চিকাৰী দুজন হ’ল  ক্ৰমে বিশ্বনাথৰ পানীভঁৰাল ননকে চাপৰিৰ ফুল মহম্মদ আৰু বিশ্বনাথৰ পাভৈৰ মুগাচাং গাঁৱৰ সম্ভুজিৎ নাৰ্জাৰী ।

দুয়োকে কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ অন্তৰ্গত পলকটা চাপৰিৰ পৰা যোৱা নিশা প্ৰায় ১ মান বজাত গঁড় হত্যা কৰিবলৈ পৰিকল্পনা কৰি থকাৰ সময়তে আটক কৰিবলৈ সক্ষম হয়।

সৰ্বমুঠ চাৰিজন চোৰাং চিকাৰী আছিল যদিও ঘটনাস্থলীৰ পৰা আন দুজনে পলাই যাবলৈ সক্ষম হয়। এই সময়ছোৱাত বন বিভাগে দুই চিকাৰীৰ পৰা এটা হস্ত নিৰ্মিত বন্দুক, তিনি জাঁই হস্ত নিৰ্মিত গুলী, এখন দা, ৫০ গ্ৰাম বাৰুদ, দুটা মোবাইল জব্দ কৰিবলৈ সক্ষম হয়।

তাৎপৰ্যপূৰ্ণ বিষয় হ’ল এয়ে যে এই জব্দ হোৱা সামগ্ৰী সমূহৰ ভিতৰত আছে শিশুৱে ব্যৱহাৰ কৰা পুতলা বন্দুকৰ গুলীও। ইতিমধ্যে পলাতক অৱস্থাত থকা আন দুজনক কৰায়ত্ত কৰাৰ বাবে অনুসন্ধান অব্যাহত ৰাখিছে বন বিভাগৰ দলে।

বিশ্বনাথ ঘাটৰ মৎস্যজীৱি লোকসকলৰ লগতে স্থানীয় ৰাইজে আৰু চোৰাং চিকাৰী কেইজনক দৃষ্টান্তমুলক শাস্তি বিহাৰ বাবে দাবী উত্থাপন কৰে।

উল্লেখ্য যে এই সমগ্ৰ অভিযানত আছিল বিশ্বনাথ বন্য প্ৰাণী সংমণ্ডলৰ অধীনস্থ বিশ্বনাথ ঘাটৰ কেন্দ্ৰীয় বনাঞ্চলিক কাৰ্যালয়ৰ বন বিষয়া ইকবাল হুছেইন, বিট অফিচাৰ মাধুৰ্য শ‌ইকীয়া, ফৰেষ্টাৰ ৱান হিৰক কলিতাৰ লগতে এছ আৰ পি এফ(SRPF), এ এফ পি এফ (AFPF). সহ বনকৰ্মী আৰু অন্যান্য বনকৰ্মী।