গৃহৰক্ষী বাহিনীৰ জোৱানৰ প্ৰহাৰত আহত বাছ চালক, ৰাষ্ট্ৰীয় ঘাইপথত পথালিকৈ বাছ ৰাখি প্ৰতিবাদ

গোৱালপাৰা জিলাৰ কৃষ্ণাইৰ ৩৭নং ৰাষ্ট্ৰীয় ঘাই পথত থকা বেইলি দলঙত আজি পুৱা গৃহৰক্ষী বাহিনীৰ জোৱানে এজন বাছ চালকক গুৰুলা গুৰুলকৈ প্রহাৰ কৰাক কেন্দ্ৰ কৰি কৃষ্ণাইত এক উত্তপ্ত পৰিস্থিতিৰ সৃষ্টি হয়।

এই ঘটনাৰ পিছতে বাছ চালক সকলে পথত বাছ ৰখাই আৰক্ষীৰ বিৰুদ্ধে তীব্ৰ প্ৰতিবাদ সাব্যস্ত কৰে।

এনে উত্তেজনাময় পৰিস্থিতিত ৰাষ্ট্ৰীয় ঘাইপথটোত প্ৰায় তিনি ঘণ্টাৰ বাবে যাতায়াত বন্ধ হৈ পৰে।

ফলত পথটোৰে আহ যাহ কৰা অন্যান্য যান-বাহনৰ লগতে এম্বুলেন্স, ছাত্ৰ-ছাত্ৰী সকলৰ মাজত এক অস্বস্তিকৰ পৰিৱেশে বিৰাজ কৰে।

এই ঘটনাৰ বাবে ৰাষ্ট্ৰীয় ঘাইপথত কেইবাখনো বাছ পথালিকৈ ৰখাই প্ৰতিবাদ সাৱ্যস্ত কৰাৰ ফলত ব্যাপক যানযঁটৰ সৃষ্টি হয়।

আৰক্ষীয়ে প্ৰতিবাদকাৰীক ঘাইপথ খালী কৰিবৰ বাবে আহ্বান জনায় যদিও ৰাইজক হাৰাশাস্তি কৰি শ শ লোক তথা যানবাহন আৱদ্ধ কৰি ঘাইপথ বন্ধ কৰাত সমস্যাৰ সৃষ্টি হয় বহুতৰে।

অৱশেত জিলাৰ শীৰ্ষ আৰক্ষীৰ হস্তক্ষেপত পৰিস্থিতি নিয়ন্ত্ৰণলৈ আহে।

ইফালে প্ৰহাৰত আহত বাছ চালকজনে গৃহৰক্ষীৰ জোৱানজনৰ বিৰুদ্ধে কৃষ্ণাই আৰক্ষী চকীত এখন এজাহাৰ দাখিল কৰে।

আৰক্ষীয়ে জোৱানজনৰ বিৰুদ্ধে বিহীত ব্যৱস্থা গ্ৰহণ কৰি তদন্ত আৰম্ভ কৰাৰ প্ৰতিশ্ৰুতি দিয়াৰ পিছতহে প্ৰতিবাদকাৰী সকলে পথ অৱৰোধ প্ৰত্যাহাৰ কৰে।