ৰাজ্যত পুনৰ কা বিৰোধী সংগ্ৰাম কুচকাৱাজৰ সময়তে গৃহমন্ত্ৰী অমিত শ্বাহৰ ঘোষণা দেশত শীঘ্ৰেই বলৱৎ হ’ব ‘কা’

অসমত পুনৰ কা বিৰোধী আন্দোলনে উকমুকনি দি উঠাৰ সময়তে কেন্দ্ৰীয় গৃহমন্ত্ৰী অমিত শ্বাহে ঘোষণা কৰিছে যে অতি শীঘ্ৰেই দেশত নাগৰিকত্ব (সংশোধনী) আইন বলৱৎ কৰা হ’ব।

এই ঘোষণাৰ পিছতে অসমৰ লগতে দেশতো কা বিৰোধী আন্দোলন পুনৰ প্ৰৱল হৈ উঠাৰ সম্ভাৱনাই দেখা দিছে।

উল্লেখ্য যে বিজেপিৰ দলীয় সভাত অংশগ্ৰহণৰ উদ্দেশ্যে দুদিনীয়া কাৰ্যসূচীৰে পশ্চিমবংগ ভ্ৰমণ কৰা গৃহমন্ত্ৰীগৰাকীয়ে ঘোষণা কৰিছে যে কোভিড১৯ৰ টিকাকৰণ হোৱাৰ পিছতে দেশত ‘কা’ বলৱৎ কৰা হ’ব।

পশ্চিমবংগৰ ব’লপুৰত সংবাদ মেল সম্বোধন কৰি অমিত শ্বাহে কয় “দেশত অব্যাহত থকা ক’ৰ’ণা মহামাৰীৰ বাবে ‘কা’ৰ নীতি তথা নিয়ম এতিয়াও প্ৰস্তুত কৰিব পৰা হোৱা নাই। যেতিয়াই কোভিড১৯ৰ টিকাকৰণ আৰম্ভ হ’ব তথা কোভিড১৯ৰ সংক্ৰমণ বন্ধ হ’ব তেতিয়াই ‘কা’ বলৱৎ কৰা হ’ব।”

ইফালে অসমত কা বিৰোধী সংগঠনসমূহে বিশেষকৈ কৃষক মুক্তি সংগ্ৰাম সমিতিসহ ৭০ জাতি-জনগোষ্ঠীয় সংগঠনে ‘কা’ৰ বিৰুদ্ধে টঙালি বন্ধাৰ কথা সংবাদ মেল যোগে ঘোষণা কৰিছে।

দেওবাৰে ছাত্ৰ মুক্তি সংগ্ৰাম সমিতিয়ে চলিত সপ্তাহটো ‘কা’ বিৰোধী সপ্তাহ পালন কৰা হ’ব বুলিও সংবাদ মেল যোগে সদৰী কৰিছে।

আনহাতে বিগত সপ্তাহটোত কৃষক মুক্তি সংগ্ৰাম সমিতিৰ উদ্যোগত উজনিৰ শিৱসাগৰত ‘কা’ৰ বিৰুদ্ধে বৃহৎ প্ৰতিবাদী সমদল উলিওৱা হৈছিল।

সদৌ অসম ছাত্ৰ সন্থাও ‘কা’ বিৰোধী আন্দোলন পুনৰ আৰম্ভ কৰাৰ কথা ঘোষণা কৰিছে।

কেন্দ্ৰীয় গৃহমন্ত্ৰীৰ এই ঘোষণাৰ পিছত ৰাজ্যত ‘কা বিৰোধী আন্দোলনে কেনে ৰূপ লয় তাৰ ওপৰতে নিৰ্ভৰ কৰিব অসমত ‘কা’ কাৰ্যকৰীকৰণে কেনে ৰূপ ল’ব!