চলিত সপ্তাহত একেৰাহে তিনিদিন বন্ধ থাকিব সকলো বেংক

চলিত সপ্তাহত যদি বেংকত যাবলগীয়া কাম আছে তেন্তে আপুনি সন্মুখীন হ’ব পাৰে কিছু অসুবিধাৰ। কিয়নো এইটো সপ্তাহত একেৰাহে তিনিদন বন্ধ থাকিব বেংক।

যদি আপুনি সপ্তাহৰ শেষৰ পিনে বেংকৰ কাম-কাজ কৰিব খুজিছে তেন্তে বন্ধৰ সবিশেষ এবাৰ জানি লওক।

সকলোৱে জ্ঞাত যে মাহৰ দ্বিতীয় আৰু চতুৰ্থ শনিবাৰৰ দিনটো বেংক বন্ধ থাকে। সেই অনুসৰি চলিত সপ্তাহৰ শনিবাৰ অৰ্থাৎ ২৬ ডিচেম্বৰৰ দিনটো মাহৰ চুতুৰ্থ শনিবাৰ হোৱা হেতুকে বেংক বন্ধ থাকিব।

সাপ্তাহিক ছুটীৰ দিন হোৱাৰ বাবে ২৭ ডিচেম্বৰ দেওবাৰে বেংক বন্ধ থাকিব।

আনহাতে চলিত সপ্তাহৰ শুকুৰবাৰ হৈছে ২৫ ডিচেম্বৰ অৰ্থাৎ বৰদিন। বৰদিনৰ দিনটো ৰাষ্ট্ৰীয় বন্ধ হিচাপে পালন কৰা হয়।

সেয়ে এইটো সপ্তাহত বেংকৰ সকলো জৰুৰী কাম বৃহস্পতিবাৰৰ ভিতৰত সমাপন কৰিব লাগিব।

উল্লেখ্য যে অহা সপ্তাহত চলিত বছৰৰ সমাপ্তি ঘটিব। ইয়াৰ পিছৰে পৰা অৰ্থাৎ নতুন বছৰৰ পৰা বেংক সম্বন্ধীয় কেইবাটাও নিয়মৰ সাল-সলনি ঘটিব।