‘ভাৰতৰ নম্বৰ কেতিয়া আহিব’, প্ৰধান মন্ত্ৰী মোদীক প্ৰশ্ন ৰাহুল গান্ধীৰ

বিভিন্ন বিষয়ক কেন্দ্ৰ কৰি নৰেন্দ্ৰ মোদী নেতৃত্বাধীন কেন্দ্ৰীয় চৰকাৰক সমালোচনা কৰি অহা কংগ্ৰেছৰ প্ৰাক্তন ৰাষ্ট্ৰীয় অধ্যক্ষ ৰাহুল গান্ধীয়ে এইবাৰ ক’ৰ’না ভেকচিনকলৈ সৰৱ হোৱা পৰিলক্ষিত হৈছে।

ৰাহুল গান্ধীয়ে চৰকাৰক লক্ষ্য কৰি কয় যে বিশ্বৰ বিভিন্ন দেশে ক’ভিড মহামাৰীৰ সন্ত্ৰাস নিৰ্মূল কৰাৰ বাবে টীকাকৰণ অভিযান আৰম্ভ কৰিছে আৰু এতিয়ালৈকে লাখৰো অধিক লোকক এই টীকা দিয়া হৈছে কিন্তু আমাৰ ইয়াত একো পদক্ষেপ গ্ৰহণ কৰা নাই।

এই পৰ্যন্ত বিশ্বৰ ২৩ লাখ লোকে এই টীকা গ্ৰহণ কৰিছে আৰু আমাৰ ইয়াৰ ক’ভিডৰ বিৰুদ্ধে টীকাকৰণ কেতিয়াৰ পৰা আৰম্ভ হ’ব বুলি প্ৰধান মন্ত্ৰীক প্ৰত্যক্ষভাৱে প্ৰশ্ন কৰিছে ৰাহুল গান্ধীয়ে।

গান্ধীয়ে টুইট কৰি প্ৰধান মন্ত্ৰী নৰেন্দ্ৰ মোদীক প্ৰশ্ন কৰি কয়, ‘বিশ্বত এতিয়ালৈকে ২৩ লাখ লোকক ক’ভিডৰ টীকা দিয়া হৈছে। চীন, আমেৰিকা, বৃটেইন, ৰাছিয়াত এই প্ৰক্ৰিয়া আৰম্ভ হৈছে। মোদী ডাঙৰীয়া, ভাৰতৰ নম্বৰ কেতিয়া আহিব কওক’।

ইয়াৰ উপৰি তেওঁ টুইটোত এটা গ্ৰাফো য়ংযুক্ত কৰিছে য’ত স্পষ্ট ৰূপত দেখা পোৱা যায় যে চীনত এই পৰ্যন্ত সৰ্বাধিক লোকৰ টীকাকৰণ হৈছে। দ্বিতীয় স্থানত আমেৰিকা, তৃতীয় স্থানত বৃটেইন আৰু চতুৰ্থ স্থানত আছে ৰাছিয়া।