কোভিড বিধিত অতিষ্ঠ!: মেট্ৰোত চুম্বন কৰি কোভিড বিধিৰ বিৰুদ্ধে প্ৰতিবাদ সাৱ্যস্ত

ক’ৰ’ণা মহামাৰীৰ আতংকত এতিয়াও সন্ত্ৰস্ত সমগ্ৰ বিশ্ব। আফ্ৰিকা মহাদেশৰ লগতে গ্ৰেট ব্ৰিটেইনত পুনৰ আৰম্ভ হৈছে পূৰ্বতকৈ বিধ্বংসী নতুন ক’ৰ’ণা ভাইৰাছৰ সংক্ৰমণ। ফলত কিছুমান দেশত কোভিড বিধি সামান্য শিথিল কৰিলেও বিশ্বৰ সকলো দেশতে অব্যাহত আছে কোভিড বিধিসমূহ।

কিছুমান দেশত পুনৰ কঠোৰভাৱে বলৱৎ কৰা হৈছে কোভিড বিধি। কঠোৰ কোভিড বিধিয়ে যেন অতিষ্ঠ কৰি তুলিছে সকলোকে।

বিশ্ব স্বাস্থ্য সংস্থাৰ গাইডলাইন মানি বিশ্বৰ দেশসমূহে নিজ নিজ দেশত কোভিড বিধি বলৱৎ কৰি আহিছে। কোভিড বিধিৰ এটা অন্যতম সুৰক্ষামূলক বিধি হৈছে সামাজিক দূৰত্ব মানি চলা।

কিন্তু এই সামাজিক দূৰত্ব মানি চলা সুৰক্ষামূলক বিধিয়ে যেন ক্ৰমাৎ অতিষ্ঠ কৰি তুলিছে প্ৰেমিক যুগলসমূহক।

তাৰেই বৰ্হিপ্ৰকাশ ঘটিছে এখন দেশত। দেশখনত কেবাযোৰাও প্ৰেমিক যুগলে কঠোৰ কোভিড বিধিৰ বিৰুদ্ধে এক অভিনৱ প্ৰতিবাদ সাৱস্ত্য কৰা এক ভিডিঅ’ ভাইৰেল হৈছে।

আন্তৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি ৰাছিয়াৰ এখন চলন্ত মেট্ৰো ট্ৰেইনত কেবাযোৰা প্ৰেমিক-প্ৰেমিকাই মুখৰ মাস্ক এৰুৱাই হঠাতে ওঁঠ ওঁঠ লগাই চুম্বনত প্ৰবৃত্ত হয়।

এইদৰে প্ৰতিবাদ সাৱস্ত্য কৰি প্ৰতিবাদকাৰী প্ৰেমিক-প্ৰেমিকাসকলে দাবী কৰিছে যে কোনো কাৰণ নোহোৱাকৈ তেওঁলোকক নাইট ক্লাৱ, পাব আদিলৈ যোৱাতো নিষিদ্ধ কৰা হৈছে। আনকি সকলো ধৰণৰ ইভেন্টত যোগদান কৰাৰ পৰা বঞ্চিত হৈছে।

ইয়াৰ তীব্ৰ প্ৰতিবাদস্বৰূপে মেট্ৰ’ ট্ৰেইনত এই অভিনৱ প্ৰতিবাদ সাৱ্স্ত্য কৰা বুলি দাবী কৰিছে প্ৰতিবাদকাৰী প্ৰেমিক যুগলসমূহে।