দুখৰ দিনত সহায়ৰ হাত আগবঢ়োৱা কংগ্ৰেছলৈ পিঠি দি বিজেপিত শৰণ ল’লে অজন্তা নেওগে

‘এটা খোলা মন লৈ বিজেপিলৈ আহিছো; ন বোৱাৰীৰ দৰে সকলোৱে আদৰি ল’ব।‘ বিজেপিত আনুষ্ঠানিকভাৱে যোগদান কৰি ভাষণ প্ৰসংগত এইদৰে কয় প্ৰাক্তন কংগ্ৰেছী মন্ত্ৰী অজন্তা নেওগে।

দলৰ মজিয়ালৈ প্ৰাক্তন কংগ্ৰেছী মন্ত্ৰীগৰাকীক আদৰণি জনায় সভাপতি ৰঞ্জিত দাস, মন্ত্ৰী ড০ হিমন্ত বিশ্ব শৰ্মা আৰু সাংগঠনিক সম্পাদক ফনীন্দ্ৰ নাথ শৰ্মাই।

ইপিনে, ভাষণ প্ৰসংগত তেওঁ ‘আজি এটা নতুন ৰাস্তাত খোজ দিলো।‘ বুলি উল্লেখ কৰি লগতে কয় ‘ৰাজনীতিত সুদীৰ্ঘ সময় আছো আৰু এটা প্ৰতিকূল পৰিস্থিতিত ৰাজনীতিলৈ আহিছিলো। মন্ত্ৰীৰ দায়িত্তব থাকোতে বা কংগ্ৰেছত থকাৰ সময়তো  কোনো স্বাৰ্থ নোহোৱাকৈ অতি নিষ্ঠাৰে সেৱা আগবঢ়াই আহিছিলো।‘

তেওঁ আৰু কয় ‘কোনো পূৰ্ব চৰ্ত নথকাকৈ খোলা মনোভাৱৰে আজি আপোনালোকৰ মজিয়ালৈ আহিছো। নতুন ঘৰখনৰ মজিয়ালৈ আহিছো। যেতিয়া ঘৰখনৰ ভিতৰলৈ আহিছো গতিকে সকলো সদস্যই সম-মৰ্য্যদাৰে এটা পৰিৱেশত থাকিব লাগে। মোক সন্মানসহকাৰে ৰাখিব লাগিব বুলি বিজেপিক পুৰ্বচৰ্ত দিছিলো।‘

‘এখন ঘৰত থাকি আন এখন ঘৰত আহিছো। এগৰাকী বোৱাৰীয়ে যেতিয়া নতুনকৈ ঘৰখনত খোজ দিয়ে তেওঁৰ যি অনুভৱ হয় সেই একেই অনুভৱ মোৰ হৈছে।‘ অজন্তাই এইদৰে কয়।

এতিয়া বিজেপিৰ নেতাসকল অজন্তাৰ বাবে অভিভাৱক বুলি উল্লেখ কৰি তেওঁ লগতে কয় ‘এই অভিভাৱকত্বৰে মোক পথ দেখুৱাব লাগিব। ভাৰতীয় জনতা পাৰ্টীৰ ভৱিষ্যত দৰ্শন আছে যিটো আমাৰ কাৰণে অতি দৰকাৰ। ৰাজনৈতিক দৰ্শন নথকা দল এটাই কেতিয়াও আগবাঢ়ি যাব নোৱাৰে।‘

ইপিনে, কংগ্ৰেছ ত্যাগৰ এটা কাৰণ বাখ্যা কৰি অজন্তাই কয় ‘ যিটো দলত আছিলো সেইটো দলত মানুহৰ মাজত ব্যৱধান বৃদ্ধি হৈছে। মই বৰ আঘাত পালো। ২০ বছৰ ধৰি যিটো দলত আছিলো তাত যিখিনি মই মৰ্য্যদা পাব লাগিছিল সেই মৰ্য্যদাত আঘাত হ’ল। সেয়েহে ততাতৈয়াকৈ বিজেপিত যোগদানৰ সিদ্ধান্ত গ্ৰহণ কৰিলো। বিজেপিত যোগদান কৰাটো পূৰ্ব পৰিকল্পিত নাছিল।‘

প্ৰাক্তন কংগ্ৰেছী মন্ত্ৰী অজন্তা নেওগৰ লগতে লক্ষীপুৰ সমষ্টিৰ প্ৰাক্তন বিধায়ক ৰাজদ্বীপ গোৱালা আৰু গৌৰীপুৰ সমষ্টিৰ প্ৰাক্তন বিধায়ক বনেন্দ্ৰ কুমাৰ মুছাহাৰীয়েও আজি  বিজেপিত আনুষ্ঠানিকভাৱে যোগদান কৰে।