নগাঁৱত ড° বাণীকান্ত কাকতি মেধা বঁটাৰ স্কুটী বিতৰণ কৰিলে মন্ত্ৰী পিযুজ হাজৰিকাই

আজি নগাঁওৰ নেহেৰুৱালীত অসম চৰকাৰৰ স্বাস্থ্য বিভাগৰ ৰাজ্যিক মন্ত্ৰী পিয়ুয হাজৰিকাই প্ৰজ্ঞান ভাৰতী আঁচনিৰ অধীনত ২০২০ বৰ্ষৰ উচ্চতৰ মাধ্যমিকৰ চূড়ান্ত পৰীক্ষাত প্ৰথম বিভাগত উত্তীৰ্ণ হোৱা জিলাখনৰ মেধাৱী ছাত্ৰী সকলক ডঃ বাণীকান্ত কাকতি মেধা বঁটা ২০২০ৰ অধীনত স্কুতি প্ৰদান কৰে।

উল্লেখযোগ্য যে, এই আঁচনিৰ জৰিয়তে জিলাখনৰ ১৯০৯ গৰাকী ছাত্ৰীয়ে স্কুতি লাভ কৰিছে।

উক্ত অনুষ্ঠানত মূখ্য অতিথিৰ ভাষণত মন্ত্ৰী গৰাকীয়ে কয় যে, আজিৰ দিনটো এক স্মৰণীয় দিন, কাৰণ এই আঁচনিৰ জৰিয়তে ছাত্ৰীসকলে শিক্ষাৰ ক্ষেত্ৰত অনুপ্ৰেৰণা লাভ কৰিব আৰু ভৱিষ্যতে আহিবলগীয়া দিনসমূহত ছাত্ৰী সকলে নতুন উদ্যমৰে অধ্যয়নত ব্ৰতী হ’ব।

তেওঁ লগতে কয় যে, শিক্ষাই আমাক সকলোকে সঠিক দিশ প্ৰদান কৰাত সহায় কৰে। সেয়েহে আমি সকলোৱে একাগ্ৰতা আৰু কঠোৰ শ্ৰমৰ জৰিয়তে শিক্ষা গ্ৰহণ কৰি নিজৰ লগতে দেশ আৰু সমাজখনক আগবঢ়াই লৈ যাব লাগিব।

এই অনুষ্ঠানত নগাঁও সদৰ সমষ্টিৰ বিধায়ক ৰূপক শৰ্মাই তেওঁৰ ভাষণত কয় যে, এই আঁচনি খন এক অভিলাষী আঁচনি, যাৰ জৰিয়তে নাৰী সৱলীকৰণত এক নতুন মাত্ৰা প্ৰদান কৰিব আৰু আমাৰ ছাত্ৰীসকল বৰ্তমান সময়ত এই বিজ্ঞান-প্ৰযুক্তিৰ দিনত আগুৱাই যোৱাত সহায়ক হ’ব আৰু আহি থকা অনাগত দিনসমূহত ছাত্ৰীসকলে শিক্ষাৰ গ্ৰহণৰ ক্ষেত্ৰত আৰু অধিক অনুপ্ৰেৰণা পাব।

আজিৰ এই অনুষ্ঠানত প্ৰাক্তন কেন্দ্ৰীয় ৰে’ল ৰাজ্যিক মন্ত্ৰী ৰাজেন গোহাঁই, জিলা উন্নয়ন আয়ুক্ত হেমন্ত ভূঞা, নগাঁও মহাবিদ্যালয়ৰ অধ্যক্ষ শৰৎ বৰকটকীকে প্ৰমূখ্য কৰি শিক্ষা বিভাগৰ বিভিন্ন বিষয়া কৰ্মচাৰী উপস্থিত থাকে।