অগ্নিত ভস্ম হ’ল বাংলাদেশৰ ৰোহিংগিয়া শৰণাৰ্থী শিৱিৰৰ ৫০০-ৰ অধিক বাসগৃহ

বাংলাদেশৰ নয়াপাৰাত থকা ৩০০০-ৰ অধিক ৰোহিংগিয়া শৰণাৰ্থীয়ে বসবাস কৰা এটা শিৱিৰত অগ্নিকাণ্ডই বিস্তৰ ক্ষতি সাধন কৰিছে।

অগ্নিকাণ্ডৰ ফলত শৰণাৰ্থী শিৱিৰটোত থকা প্ৰায় ৫০০ টা গৃহ সম্পুৰ্ণ ৰূপে ধ্বংস হৈ পৰে।

বাংলাদেশৰ শৰণাৰ্থী আয়ুক্ত ৰিজৱান ৰেজাৱানে সংবাদ মাধ্যমক জানিবলৈ দিয়া অনুসৰি অগ্নিকাণ্ডটোৰ ফলত কোনোলোকৰ মৃত্যু হোৱা নাই যদিও ১০ গৰাকী ব্যক্তি আঘাতপ্ৰাপ্ত হৈছে।

বৃহস্পতিবাৰে নিশা প্ৰায় ২ বজাত শৰণাৰ্থী শিৱিৰটোত অগ্নিকাণ্ডৰ সৃষ্টি হয় বুলি জানিব পৰা গৈছে।

ম্যানমাৰত ৰোহিংগিয়া সকলৰ ওপৰত হোৱা আক্ৰমণৰ পাছতে বাংলাদেশৰ নয়াপাৰাত থকা শৰণাৰ্থী শিৱিৰত বহু সংখ্যক ৰোহিংগিয়া শৰণাৰ্থীয়ে বাস কৰি আছে।

ৰাষ্ট্ৰসংঘৰ শৰণাৰ্থী এজেঞ্চিয়ো এই অগ্নিকাণ্ডক লৈ উদ্বেগ ব্যক্ত কৰে। য়ু এন এইচ চি আৰে সদৰী কৰা মতে ৩৫০০ শৰণাৰ্থী থকা প্ৰায় ৫৫০ টা বাসগৃহ অগ্নিকাণ্ডৰ ফলত সম্পুৰ্ণৰূপে জাহ যায়।

অগ্নিকাণ্ডত ধ্বংস হৈ পৰা বাসগৃহ সমূহ টিন আৰু বাহেৰে প্ৰস্তুত কৰা হৈছিল।

‘‘আমি অগ্নিকাণ্ডৰ পাছতে উক্ত শিৱিৰত উদ্ধাৰ অভিযান আৰম্ভ কৰিছো আৰু গৰম খাদ্যৰ লগতে প্ৰয়োজনীয় টিন আৰু বাহৰ ব্যৱস্থা কৰিছো,’’ বাংলাদেশৰ শৰণাৰ্থী আয়ুক্ত গৰাকীয়ে লগতে কয়।

ৰন্ধন গেছৰ চিলিণ্ডাৰৰ বিস্ফোৰণৰ ফলতে অগ্নিকাণ্ডতো সংঘটিত হোৱা বুলি ধাৰণা কৰা হৈছে।