ব্লেক টি হ’ব চীনৰ ই-কমাৰ্চ প্লেটফৰ্মত বিপণন হবলগীয়া ম্যানমাৰৰ প্ৰথম পণ্য

চীনৰ ই কমাৰ্চৰ জগতত খনত ব্লেক টিৰ জৰিয়তে প্ৰথমবাৰৰ বাবে ভুমুকি মাৰিবলৈ ওলাইছে ম্যানমাৰে।

দেশ খনত বিশেষ ভাবে জনপ্ৰিয় ব্লেক টি এতিয়া চীনৰ ই-কমাৰ্চ প্লেটফৰ্মৰ জৰিয়তে সমগ্ৰ বিশ্বতে বিয়পি পৰিব।

ইতিমধ্যে ১৪ জানুৱাৰীত ম্যানমাৰৰ টাৱিন কানবাউজা মাউণ্টেইন কোম্পানী লিমিটেডৰ সৈতে চীনৰ গুৱাংঝি CAEXPO ব্ৰেণ্ড মেনেজমেণ্ট কোম্পানীয়ে  ব্লেক টিৰ বিপণন সম্পৰ্কীয় এক চুক্তি স্বাক্ষৰ কৰিছে।

উক্ত চুক্তি মৰ্মে ম্যানমাৰৰ ব্লেক টি চীনৰ কোম্পানীটোৱে চীনা ই কমাৰ্চ প্লেটফৰ্মত বিপণনৰ ব্যৱস্থা কৰিব।

ম্যানমাৰৰ টাৱিন কানবাউজা মাউণ্টেইন কোম্পানী লিমিটেডৰ ভগ্নী সংস্থা  ‘য়কে দ্য’ ই বিগত ৩০ বছৰীয়া অভিজ্ঞতাৰ ভিত্তিত  উন্নত মানৰ ব্যতিক্ৰমী ব্লেক টি উৎপাদন কৰি আহিছে।

এই ব্লেক টি ম্যানমাৰৰ বাসিন্দাসকলৰ মাজত অতি জনপ্ৰিয় যদিও বিশ্বৰ বজাৰত এই চাহ বিধ ইমান দিনে উপলব্ধ হোৱা নাছিল।

চীনৰ ই কমাৰ্চ প্লেটফৰ্মত এই পণ্য বিধ অন্তৰ্ভূক্ত হোৱাৰ লগে লগে চাহ বিধ এতিয়া চীনৰ লগতে বিশ্বৰ বিভিন্ন প্ৰান্তৰ গ্ৰাহকে ক্ৰয় কৰাৰ সুবিধা লাভ কৰিব।

ব্লেক টিয়েই হৈছে চীনৰ ই কমাৰ্চ প্লেটফৰ্মত স্থান লাভ কৰা ম্যানমাৰৰ প্ৰথম পণ্য।

এই প্ৰসংগত মন্তব্য কৰি ‘য়কে দ্য’ৰ মুখ্য কাৰ্যবাহী বিষয়া ড’ য়িন য়িন হানে কয় যে চীনৰ ই কমাৰ্চ প্লেটফৰ্মৰ জৰিয়তে তেওঁলোকৰ কোম্পানীয়ে উৎপাদন কৰা ব্লেক টি বিশ্বৰ লাখ লাখ চাহপ্ৰেমীৰ মাজত বিয়পি পৰিবলগীয়া কথাটোৱে তেওঁক যথেষ্ঠ আনন্দিত কৰি তুলিছে।