ভাৰতীয় দলৰ প্ৰাক্তন গ’লকীপাৰ প্ৰশান্ত ডোৰাৰ মৃত্যু; মোহন বাগানৰ শোকপ্ৰকাশ

ভাৰতীয় ফুটবল দলৰ প্ৰাক্তন গ’লকীপাৰ প্ৰশান্ত ডোৰাই মঙলবাৰে শেষ নিশ্বাস ত্যাগ কৰে। ৪৪ বছৰীয়া ডোৰাই মৃত্যুৰ সময়ত পত্নী আৰু এগৰাকী ১২ বছৰীয়া কন্যাক এৰি থৈ যায়।

ডোৰাৰ জ্যেষ্ঠ ভাতৃ তথা ভাৰত আৰু মোহন বাগানৰ প্ৰাক্তন গ’লকীপাৰ হেমন্তই জানিব দিয়া অনুসৰি প্ৰশান্তৰ ধাৰাবাহিকভাৱে জ্বৰ হৈ আছিল আৰু যোৱা ডিচেম্বৰ মাহত তেওঁ হেমোফেগোছিটিক লিম্ফোহিষ্টোছাইটোছিছ ৰোগত আক্ৰান্ত হোৱাৰ কথা জানিব পাৰে।

জ্যেষ্ঠ ভাতৃয়ে সংবাদ মাধ্যমৰ আগত কয়, ‘এই ৰোগ ধৰা পেলোৱাত চিকিৎসকে বহুত বেছি সময় লয়। পিছত টাটা মেডিকেলত তেওঁৰ চিকিৎসা চলে। আমি তেওঁক তেজ দি আছিলো, কিন্তু তেওঁ জীয়াই নাথাকিল আৰু আজি দুপৰীয়া ১ বাজি ৪০ মিনিটত শেষ নিশ্বাস ত্যাগ কৰে’।

ইফালে প্ৰাক্তন গ’লকীপাৰ গৰাকীৰ মৃত্যুত গভীৰ দুখ প্ৰকাশ কৰে মোহন বাগানে।

উল্লেখ্য যে ১৯৯৯ চনত থাইলেণ্ডৰ বিৰুদ্ধে ভাৰতীয় দলত অভিষেক ঘটিছিল তথা তেওঁ ছাফ কাপ আৰু ছাফ খেলত ভাৰতক প্ৰতিনিধিত্ব কৰিছিল।

ইয়াৰ উপৰি তেওঁ ১৯৯৭-৯৮ আৰু ১৯৯৯ চনত সন্তোষ ট্ৰফিৰ সৰ্বশ্ৰেষ্ঠ গ’লকীপাৰ হিচাপে সন্মানিত হৈছিল।

টলীগঞ্জ অগ্ৰগামীৰ হৈ কেৰিয়াৰ আৰম্ভ কৰা প্ৰশান্তে পিছলৈ কলকাত্তা প’ৰ্ট ট্ৰাষ্ট, মোহম্মডন স্প’ৰ্টিং, মোহন বাগান আৰু ইষ্ট বেংগলৰ হৈ খেলিছিল।