“ন্যায়ালয়লৈ কোন যায়? ন্যায়ালয়লৈ গৈ আপুনি অনুশোচিত হ’ব।”- ৰঞ্জন গগৈৰ বক্তব্যৰ পাছতে দেশজুৰি চৰ্চা

ইণ্ডিয়া টুডে গ্ৰুপৰ এটা অনুষ্ঠানত উচ্চতম  ন্যায়ালয়ৰ প্ৰাক্তন মুখ্য ন্যায়াধীশ  তথা ৰাজ্যসভাৰ সাংসদ ৰঞ্জন গগৈয়ে বিভিন্ন প্ৰশ্নৰ উত্তৰ দি চৰ্চা লাভ কৰিছে।

ৰাজ্যসভা মনোনয়ন, অযোধ্যাৰ ৰামমন্দিৰ-বাবৰী মচজিদৰ ৰায়প্ৰদান আৰু ৰাফালে চুক্তি সম্পৰ্কে গগৈক বিভিন্ন প্ৰশ্ন সোধা হয়।

ৰাজ্যসভাৰ মনোনয়নৰ স’তে মোদী চৰকাৰৰ সপক্ষত প্ৰদান কৰা ৰায়সমূহৰ স’তে সম্পৰ্ক আছে নেকি সোধা প্ৰশ্নৰ উত্তৰত তেওঁ কয় যে যদি তেওঁ কিবা পোৱাৰ আশাত এইসমূহ কৰিছিল, তেন্তে মাত্ৰ এটা ৰাজ্যসভাৰ চিট বিচাৰিব নে?

“ৰাজ্যসভা এটা ভাল চৰ্ত হ’ব নোৱাৰে।” তেওঁ কয়। “যদি এটা চৰ্ত থাকিলেহেঁতেন, তেনেহ’লে ইয়াতকৈ এটা বৃহৎ চৰ্ত হ’লহেঁতেন, ৰাজ্যসভাৰ চিটটো নহয়।’’

ভাৰতৰ ন্যায়প্ৰদানৰ ব্যৱস্থা সম্পৰ্কত তেওঁ তীক্ষ্ণভাৱে কয় যিসময়ত দেশখনৰ অৰ্থনীতিয়ে ফাইভ ত্ৰিলিয়ন ডলাৰ স্পৰ্শ কৰি বিশ্বত স্থান দখল কৰিছে, সেইসময়তে দেশৰ  ন্যায়পালিকা “ভগ্নপ্ৰায়’’ (ramshackled)হৈ পৰিছে।

নিজৰ ওপৰত আৰোপিত যৌন নিৰ্যাতনৰ অভিযোগ সন্দৰ্ভত তেওঁ কয় যে ইয়াৰ বাবে তেওঁ ন্যায়ালয়ৰ ওপৰত ভৰসা নকৰে। তেওঁ কয়- “ন্যায়ালয়লে কোন যায়? আপুনি ন্যায়ালয় গৈ অনুশোচিত হ’ব।”

এইক্ষেত্ৰত তেওঁ আৰু ইংগিত দিয়ে যে ন্যায়পালিকা ভগ্নপ্ৰায় হোৱাৰ মূলতে হ’ল ন্যায়ালয়ত কৰ্পোৰেট ব্যৱসায়ী আৰু চহকী লোকসকলে সুবিচাৰ লাভৰ ক্ষেত্ৰত অধিক প্ৰাধান্য লাভ কৰে।

জাষ্টিছ এম.আৰ. শ্বাহে শেহতীয়াকৈ প্ৰধানমন্ত্ৰী নৰেন্দ্ৰ মোদীক ৰাজহুৱাকৈ দেশৰ হিৰো আৰু মডেল হিচাপে মুকলি প্ৰশংসা কৰাক লৈ গগৈয়ে কয় যে জাষ্টিছ শ্বাহে এজন বিচাৰপালক হিচাপে এই বক্তব্য ৰাজহুৱাভাৱে প্ৰদান কৰা অনুচিত।

অসমৰ এনআৰচি সম্পৰ্কত তেওঁ এনআৰচি তালিকাখন কাৰ্যকৰী কৰাত গুৰুত্ব দি তেওঁ কয় যে ই ভৱিষ্যতৰ বাবে এখনি দলিল আৰু ইয়াক বিশ্লেষণ কৰাটো জৰুৰী।

ন্যায়পালিকাৰ ওপৰত মিডিয়াৰ হস্তক্ষেপৰ বিষয়ে গগৈয়ে গুৰুত্ব আৰোপ কৰি কয় যে ই বিচাৰকসকলৰ বাবে এটা গুৰুত্বপূৰ্ণ ভাবুকি।

তেওঁ  আৰু কয় যে বিচাৰক বৃত্তিটো আৱেগৰ স’তে জড়িত আৰু ইয়াৰ কোনো নিৰ্ধাৰিত কৰ্মসময় সময় নাই। ৰাতি দুই বজাটো এজন বিচাৰকে কাম কৰে।

শেহতীয়া কৃষক বিক্ষোভ আৰু কা-বিৰোধী আন্দোলন সম্পৰ্কে তেওঁক সোধা প্ৰশ্নৰ উত্তৰত কয় যে এইক্ষেত্ৰত ৰাজনৈতিক-আইনী সমাধানৰ ব্যৱস্থা গ্ৰহণ কৰা উচিত আৰু ন্যায়ালয়ে বিষয়টোত গুৰুত্ব প্ৰদান কৰা উচিত।

ভাৰতীয় ন্যায়পালিকাৰ বিষয়ে কৰা গগৈৰ এই বক্তব্যৰ পাছতে দেওবাৰে এনচিপিৰ জ্যেষ্ঠ নেতা শাৰদ পাৱাৰে পুনেত প্ৰতিক্ৰিয়া প্ৰকাশ কৰি কয় যে যদি গগৈয়ে সত্যক উন্মোচিত কৰিছে, তেনেহ’লে এয়া সকলোৰে বাবে উদ্বেগজনক বিষয়।