তৃতীয় টেষ্টৰ বাবে ভাৰতীয় স্কোৱাদ ঘোষণা, শ্বাৰদুল ঠাকুৰৰ স্থানত উমেশ যাদৱ

ইংলেণ্ডৰ বিৰুদ্ধে চলিত চাৰিখনীয়া টেষ্ট শৃ্ংখলাটোৰ বাকী থকা দুখন টেষ্টৰ বাবে টীম ইণ্ডিয়াৰ ১৭জনীয়া স্কোৱাদটো ঘোষণা কৰা হৈছে।

আঘাতৰ বাবে খেলপথাৰৰ পৰা আঁতৰি থকা ফাষ্ট বলাৰ উমেশ যাদৱ দললৈ উভটি আহিছে।

যাদৱে শ্বাৰদুল ঠাকুৰৰ স্থান গ্ৰহণ কৰিছে। শ্বাৰদুল ঠাকুৰে ২০ ফেব্ৰুৱাৰীৰ পৰা অনুষ্ঠিত হ’ব লগা বিজয় হাজাৰে ট্ৰফীত ভাগ ল’ব।

এক সূত্ৰমতে মহম্মদ চিৰাজ আৰু নৱদীপ চাইনীয়ে তৃতীয় টেষ্টত অংশ লোৱাৰ সম্ভাৱনা আছে, কিন্তু সূত্ৰটোৱে প্ৰকাশ কৰা মতে তেওঁলোকৰ ফিটনেছৰ সমস্যা আছে।

ফিটনেছৰ সমস্যাৰ বাবে তাৰকা অলৰাউণ্ডাৰ ৰবীন্দ্ৰ জাডেজাও বাকী থকা দুখন টেষ্টৰ পৰা বাদ পৰিছে।

চৰ্চা চলিছে যে দ্বিতীয় টেষ্টৰ পৰা বাদ পৰি থকা যশপ্ৰীত বুমৰাহ তৃতীয় টেষ্টত উভটি আহিব পাৰে।

তদুপৰি অনুমান কৰা হৈছে যে অলৰাউণ্ডাৰ হাৰ্দিক পাণ্ডিয়াকো অন্তৰ্ভূক্ত কৰা হ’ব পাৰে।

উল্লেখযোগ্য যে আহমেদাবাদৰ মটেৰা ষ্টেডিয়ামত ২৪ ফেব্ৰুৱাৰীৰ পৰা অনুষ্ঠিত হ’ব লগা দিবা-নৈশ তৃতীয় টেষ্টখনত গুলপীয়া বল ব্যৱহাৰ কৰা হ’ব।

প্ৰথম টেষ্টত ২২৭ ৰাণত পৰাজীত হোৱাৰ পাছত ভাৰতীয় দলটোৱে দ্বিতীয় টেষ্টত ৩১৭ ৰাণৰ বৃহৎ ব্যৱধানত বিজয়ী হৈ শৃংখলাটোত সমতা স্থাপন কৰিছে।

বুধবাৰে নিৰ্বাচক কমিটিয়ে ঘোষণা কৰা স্কোৱাদটোঃ বিৰাট কোহলী (অধিনায়ক), আজিংক্য ৰাহানে (সহঃ অধিনায়ক), ৰোহিত শৰ্মা, মায়ংক আগৰৱাল, শুভমন গীল, চেটেশ্বৰ পুজাৰা, কে এল ৰাহুল, হাৰ্দিক পাণ্ডিয়া, ৰিষভ পণ্ট (উইকেটকীপাৰ), ৰিধিমান সাহা (উইকেট কীপাৰ), ৰবীচন্দ্ৰন অশ্বিন, কুলদীপ যাদৱ, অক্ষৰ পেটেল, ৱাশ্বিংটন সুন্দৰ, ইশান্ত শৰ্মা, যশপ্ৰীত বুমৰাহ আৰু মহম্মদ চিৰাজ।