বিজেপি কৰ্মীৰ গুণ্ডাগিৰী আৰম্ভ : নলবাৰীত এজেপিৰ সভাপতিক লুৰীণজ্যোতি গগৈক আক্ৰমণ

অসমতো উত্তৰ ভাৰত, পশ্চিমবংগৰ দৰে নিৰ্বাচনী হিংসা আৰম্ভ হ’ব নেকি?

এই প্ৰশ্নই এতিয়া দোলা দি গৈছে ৰাজ্যৰ সচেতন মহলক।

দেওবাৰে অসম জাতীয় পৰিষদৰ সভাপতি লুৰীণজ্যোতি গগৈসহ প্ৰাক্তন মন্ত্ৰী তথা অজাপৰ নেতা পুলকেশ বৰুৱাক শাসনাধিষ্ঠ বিজেপি দলৰ কৰ্মী তথা সদস্যই আক্ৰমণ কৰাৰ পিছত এই প্ৰশ্নই দোলা দি যোৱাৰ লগতে ৰাজ্য ৰাজনীতিত তোলপাৰ লাগিছে।

উল্লেখ্য যে দেওবাৰে নলবাৰী জিলাত একাংশ বিজেপি কৰ্মীয়ে অজাপৰ সভাপতি লুৰীণজ্যোতি গগৈৰ গাড়ীক আগচি ধৰি আক্ৰমণ কৰে।

ঘটনাৰ বিৱৰণীৰ মতে নলবাৰী জিলাৰ বৰক্ষেত্ৰী বিধানসভা সমষ্টিৰ নিৰ্বাচনী প্ৰচাৰ সভাত অংশগ্ৰহণ কৰিবলৈ যোৱাৰ পথত বাঁহজানী কালাগত একাংশ বিজেপি কৰ্মীয়ে হাতে হাতে বিজেপিৰ পাতাকা লৈ লুৰীণজ্যোতি গগৈৰ গাড়ী আগভেটি ধৰি আক্ৰমণ কৰে।

আক্ৰমণ সংঘটিত কৰা বিজেপি কৰ্মীসকল স্থানীয় বিধায়ক নাৰায়ণ ডেকাৰ সমৰ্থক বুলি জানিব পৰা গৈছে।

৪৭/১ নং উপৰ বৰভাগ পঞ্চায়তৰ বিজেপিৰ সভাপতি মিণ্টু কলিতাৰ নেতৃত্বত বিজেপিৰ একাংশ গুণ্ডা প্ৰকৃতিৰ কৰ্মীয়ে আক্ৰমণ কৰে অজাপৰ সভাপতি লুৰীণজ্যোতি গগৈক।

এই আক্ৰমণ সংঘটিত হোৱাৰ পিছতে অসম জাতীয় পৰিষদে এই ঘটনাক তীব্ৰ ভাষাৰে গৰিহণা দিছে।

ইফালে অজাপৰ সভাপতি লুৰীণজ্যোতি গগৈয়ে এই আক্ৰমণ ঘটনাৰ বিৰুদ্ধে নিৰ্বাচন আয়োগক যথোচিত ব্যৱস্থা গ্ৰহণ কৰিবলৈ দাবী জনাইছে।