বিজেপি ত্যাগ কৰি কংগ্ৰেছত যোগ দিয়েই মহা বিস্ফোৰণ বিতোপন শইকীয়াৰ

এসময়ৰ সক্ৰিয় বিজেপি কৰ্মী বিতোপন শইকীয়াই কালি সন্ধ্যা ভাৰতীয় জাতীয় কংগ্ৰেছত যোগদান কৰিয়েই বহু আবেগিক মন্তব্য কৰিলে স্ব- গৃহ গোলাঘাটত।

বিজেপিৰ হৈ বহু ত্যাগ কষ্ট কৰি অহা এই তৃণমূল কৰ্মীজনে অৱশেষত কংগ্ৰেছত যোগদান কৰিলে। বিজেপিৰ প্ৰতাৰণাৰ প্ৰতিবাদ জনাই শইকীয়াই ক’লে—বহু সৰল মানুহক হত্যা কৰা হ’ল।

বিজেপিৰ কেন্দ্ৰীয় আৰু ৰাজ্যিক কৰ্তৃপক্ষই গোলাঘাট সমষ্টিত ন বিজেপি অজন্তা নেওগক প্ৰাৰ্থিত্ব প্ৰদান কৰাত গোলাঘাটৰ ৰাজনৈতিক ছবিখনেই যেন সলনি হল।

তাৰ বৰ্হিপ্ৰকাশ ঘটিল আজি। কংগ্ৰেছত যোগদান কৰি স্ব – গৃহ গোলাঘাটত উপস্থিত হোৱাৰ পিছতেই পূৰ্বৰ বিজেপি নেতাজনক বিশাল বাইক ৰেলীৰে উষ্ম আদৰণি জনালে গোলাঘাট কংগ্ৰেছে।

কংগ্ৰেছৰ কৰ্মীসকলে অভূতপূৰ্ব সঁহাৰি জনালে শইকীয়াৰ প্ৰতি।

নিশ্চিতভাৱে গোলাঘাটত ৰাজনৈতিক প্ৰেক্ষাপটে এক নতুন মোৰ ললে।

কিছুদিন পূৰ্বে একালৰ শক্তিশালী কংগ্ৰেছ নেত্ৰী অজন্তা নেওগে কংগ্ৰেছ দল ত্যাগ কৰোতে শূন্য হৈ পৰিছিল কংগ্ৰেছৰ ভেটি।

যদিও আজি গোলাঘাটৰ এই পৰিবেশ দেখি কব পাৰি যে পুনৰ যেন কংগ্ৰেছৰ ভেটি সুদৃঢ় হবলৈ গৈ আছে ।

ইফালে অভিনন্দন গ্ৰহণ কৰি শইকীয়াই কয় যে  অসমৰ ভূমিপুত্ৰ চুতীয়া জনগোষ্ঠীৰ উন্নয়নৰ স্বাৰ্থত তেওঁ বিজেপিত যোগদান কৰিছিল আৰু দলটোৰ বাবে তেওঁ অশেষ কষ্ট আৰু ত্যাগ স্বীকাৰ কৰিছিল ।

তেওঁৰ দৰে আৰু বহুজন বিজেপি কৰ্মীৰ দলটোৰ প্ৰতি  অশেষ ত্যাগ থকাৰ কথা উল্লেখ কৰি শইকীয়াই কয় যে দলটোৰ প্ৰাৰ্থী তালিকাত বহু ৰথী-মহাৰথীৰ নামো বাদ পৰিল।

লগতে অসমৰ ভূমিপুত্ৰ চুতীয়া জনগোষ্ঠীক বিজেপিয়ে প্ৰাধান্য নিদিয়াতো ক্ষোভিত হৈ পৰিছে নেতাজন ।

ছয় জনগোষ্ঠীৰ আহ্বায়ক শইকীয়াই কংগ্ৰেছত যোগদান কৰিয়েই সমষ্টিটোত জয়ৰ ধ্বজা উৰুওৱাৰ হুংকাৰ দিয়ে।

উল্লেখ্য যে, খবৰ অনুসৰি বিতোপন শইকীয়াৰ প্ৰায় ৫০০০ সমৰ্থকে কাইলৈ আনুষ্ঠানিকভাৱে জাতীয় কংগ্ৰেছত যোগদান কৰিব।