বিজেপিয়ে কঁকালত মৰা কোব পাহৰা নাই হাগ্ৰামাই, হেলিকপ্তাৰত উঠি গ’ল প্ৰচাৰ চলাবলৈ

অসমত কংগ্ৰেছ মিত্ৰজোঁট দলৰ  চৰকাৰ হব আৰু ৭০ তকৈও অধিক আসন মিত্ৰজোঁটে লাভ কৰিব। এই দাবী বিটিচিৰ প্ৰাক্তন মুৰব্বী হাগ্ৰামা মহিলাৰীৰ।

বিটিচি নিৰ্বাচনৰ পিছত বিজেপিয়ে কৰা প্ৰতাৰণাৰ কথা পাহৰি যোৱা নাই  হাগ্ৰামাই।

সেয়ে যিকোনো প্ৰকাৰে বিজেপি মিত্ৰজোঁটক পৰাবূত কৰিবলৈ কঁকালত টঙালি বান্ধিছে হাগ্ৰামাই।

আজিৰে পৰাই আৰম্ভ হল হাগ্ৰামাৰ নিৰ্বাচনী হেলিকপ্টাৰ যাত্ৰা।

দ্বিতীয় পৰ্যায়ৰ নিৰ্বাচনৰ মনোয়ন পত্ৰ দাখিলৰ দিনা কংগ্ৰেছৰ সভাপতি ৰিপুন ব‌ৰাক সংগ দিবলৈ হেলিকপ্টাৰ আহিল কোকৰাঝাৰলৈ।

বি পি এফ প্ৰধান হাগ্ৰামা মহিলাৰীক ” Pick up” কৰিবলৈ কোকৰাঝাৰৰ গ্ৰীন ফিল্ডত উপস্থিত হল হেলিকপ্টাৰ।

উজনি অসমত মিত্ৰজোট কংগ্ৰেছৰ দলৰ প্ৰাৰ্থীৰ হৈ প্ৰচাৰ চলাব হাগ্ৰামা মহিলাৰীয়ে।

ষ্টাৰ কেম্পেইনাৰ ৰূপত হাগ্ৰামা মহিলাৰীয়ে যাত্ৰা কৰাৰ পুৰ্বে সংবাদ মাধ্যমৰ আগত দাবী কৰে যে কংগ্ৰেছ মিত্ৰজোঁট দলৰ অসমত চৰকাৰ হব সেয়া নিশ্চিত আৰু ৭০ তকৈও অধিক আসন মিত্ৰজোঁটে লাভ কৰিব।

উল্লেখ্য বিটিচি নিৰ্বাচনত সৰ্বাধিক আসন লাভ কৰাৰ পিছতো বিজেপিয়ে মিত্ৰতাৰ ধৰ্ম ভংগ কৰি বিপিএফৰ সলনি প্ৰমোদ বড়োৰ ইউপিপিএলকহে সমৰ্থন দিছিল।

ফলত বিটিচিত চৰকাৰ গঠনৰ পৰা বঞ্চিত হৈছিল হাগ্ৰামা মহিলাৰীৰ দল।

বিপিএফৰ নেত্ৰী প্ৰমীলা ৰাণী ব্ৰহ্মই আক্ষেপেৰে কৈছিল যে বিজেপিয়ে বিপিএফক কুকুৰৰ দৰে ব্যৱহাৰ কৰিছে।

সেয়ে বিজেপিৰ প্ৰতাৰণাৰ পোতক তুলিবলৈ সাজু হৈছে হাগ্ৰামা।