হ্ৰাস কৰা হ’ল মদ খোৱাৰ বাবে বয়সৰ সীমা! কিমান বছৰ বয়সৰ পৰা কৰিব পাৰিব মদ্যপান?

আইনগতভাৱে মদ্যপানৰ বয়সৰ সীমা হ্ৰাস কৰিলে দিল্লীয়ে। পূৰ্বে দেশৰ ৰাজধানীখনত ২৫ বছৰৰ তলত কোনোৱে মদ খাব বা ক্ৰয় কৰিব নোৱাৰিছিল।

এইবাৰ প্ৰশাসনে এই বয়সৰ সীমা হ্ৰাস কৰি ২১ বছৰ কৰিছে। দিল্লী মন্ত্ৰীসভাত নতুন এক্সাইজ নীতি অনাৰ পাছতে এইদৰে মদ্যপানৰ বাবে বয়সৰ সীমা হ্ৰাস কৰা হৈছে।

দিল্লীৰ উপ মুখ্যমন্ত্ৰী মনীষ ছিচোদিয়াই এক সংবাদমেলত এই কথা ঘোষণা কৰিছে।

বয়সৰ সীমা হ্ৰাস কৰাৰ উপৰি দিল্লী চৰকাৰে চহৰখনৰ ভিতৰত আৰু কোনো নতুন মদৰ দোকান খোলাৰ অনুমতি দিয়াটো বন্ধ কৰিছে।

ছিচোদিয়াই কয় যে যিবোৰ মদৰ দোকান চলি আছে তাত চৰকাৰৰ দায়িত্ব নাই। তদুপৰি, দিল্লীৰ যিবোৰ মদৰ দোকানৰ লাইচেন্স নাই সেইবোৰ বন্ধ কৰি দিয়া হ’ব।

মন্ত্ৰীসভাই নতুন এক্সাইজ পলিচিত অনুমোদন জনোৱাৰ কথা সদৰী কৰি কয় যে দেশৰ ৰাজধানীখনত কোনো মদৰ দোকান নোখোলাৰ সিদ্ধান্ত লোৱা হৈছে।  সেইদৰে চৰকাৰে আৰু কোনো মদৰ দোকান পৰিচালনাৰ দায়িত্ব নলয়।

উল্লেখ্য যে বৰ্তমান দিল্লীত থকা ৬০ শতাংশ মদৰ দোকানৰ পৰিচালনা কৰে চৰকাৰে। এইক্ষেত্ৰত নিয়ন্ত্ৰণ অনাৰ বাবেই নতুন নীতি অনা হৈছে বুলি কোৱা হৈছে।