প্ৰথম পৰ্যায়ৰ ভোটগ্ৰহণত প্ৰায় ৭৭শতাংশ ভোটদান; কৰ্তব্যৰত নিৰ্বাচনী বিষয়াৰ মৃত্যু, আৰু কি ঘটিল?

অসম বিধানসভাৰ শনিবাৰে অনুষ্ঠিত প্ৰথম পৰ্যায়ৰ ৪৭টা সমষ্টিৰ ভোটগ্ৰহণত প্ৰায় ৭৭শতাংশ ভোটাৰে ভোটদান কৰে।

মুঠ ৮১.০৯ লাখ ভোটাৰে কোভিড-১৯ৰ বিধি মানি তেওঁলোকৰ ভোটাধিকাৰ সাৱ্যস্ত কৰে। নিৰ্বাচন আয়োগৰ এগৰাকী বিষয়াই এই কথা জানিবলৈ দিয়ে।

বিষয়াগৰাকীয়ে জানিবলৈ দিয়া মতে সন্ধিয়া ৬বজালৈকে ৭৬.৮৯ শতাংশ ভোটদানৰ হাৰ নিশ্চিত কৰা হৈছে। এই হাৰ সামান্য বৃদ্ধি পাব পাৰে বুলিও তেওঁ জানিবলৈ দিয়ে।

শনিবাৰে অনুষ্ঠিত প্ৰথম পৰ্যায়ৰ ভোটগ্ৰহণৰ সময়ত এগৰাকী কৰ্তব্যৰত নিৰ্বাচনী বিষয়াৰ মৃত্যু ঘটে। তুলসী খনিকৰ নামৰ প’লিং বিষয়া গৰাকীৰ হৃদৰোগত আক্ৰান্ত হৈ মৃত্যু ঘটে।

সোনাৰি সমষ্টিৰ হাজোৱা এল পি স্কুল ভোটগ্ৰহণ কেন্দ্ৰত নিয়োজিত বিষয়াগৰাকীক হস্পিতাললৈ লৈ যোৱা পথতেই মৃত্যু হয়।

সেইদৰে, আন এগৰাকী প্ৰিজাইডিং বিষয়াক কৰ্তব্যৰত অৱস্থাত ষ্ট্ৰোকত আক্ৰান্ত হোৱাৰ পাছত হাস্পাতলত ভৰ্তি কৰোৱা হয়।

লখিমপুৰ জিলাৰ বিহপুৰীয়া সমষ্টিৰ কচুৱা মাজগাঁও ভোটগ্ৰহণ কেন্দ্ৰত নিয়োজিত বিষয়াগৰাকী ষ্ট্ৰোকত আক্ৰান্ত হোৱাত ততাতয়াকৈ ওচৰৰ হাস্পাতললৈ লৈ যোৱা হয়।

আনহাত,  ডিব্ৰুগড়ৰ লাহোৱালৰ নিজ মৈদঙীয়া ভোটকেন্দ্ৰত ডাঃ মুনিন পাঠক নামৰ কৰ্তব্যৰত চিকিৎসকজনে ভোটাৰক পিষ্টল দেখুৱাৰ এক ঘটনা সংঘটিত হয়।

কোভিড প্ৰটকল নিয়ন্ত্ৰণ কৰিবলৈ গৈ লাহোৱাল উপ–স্বাস্থ্যকেন্দ্ৰৰ ভাৰপ্ৰাপ্ত বিষয়াগৰাকীয়ে ৰাইজক পিষ্টল দেখুৱায়।

এনে ঘটনাৰ পাছতেই ভোটকেন্দ্ৰটোত উত্তেজনাৰ সৃষ্টি হয় আৰু উত্তেজিত ৰাইজে চিকিৎসকগৰাকীক অৱৰোধ কৰি ৰাখে।

ইয়াৰ মাজতে ঘটনাস্থলীত আৰক্ষী উপস্থিত হৈ চিকিৎসকগৰাকীক উদ্ধাৰ কৰাৰ লগতে আৰক্ষীয়ে  চিকিৎসকগৰাকীক গ্ৰেপ্তাৰ কৰি ডিব্ৰুগড় সদৰ থানালৈ লৈ যায়।

চিকিৎসকগৰাকীৰ হাতৰ পৰা আৰক্ষীয়ে এটা অনুজ্ঞাপত্ৰ থকা .৩২ পিষ্টল জব্দ কৰিছে।