নিৰ্বাচন গ’ল! অধিক চিৰিয়াছ হৈ পৰিল স্বাস্থ্যমন্ত্ৰী আৰু বিহু পালন কৰাত বান্ধি দিলে এইবোৰ নিয়ম

ৰাজ্যত তিনিটা পৰ্য্যায়ৰ নিৰ্বাচনৰ অন্ত পৰিল। ৰাজনৈতিক দলসমূহে হাজাৰ হাজাৰ লোকৰ উপস্থিতিত সভা-সমিতি অনুষ্ঠিত কৰিলে।

নিৰ্বাচনী প্ৰচাৰৰ ধুম-খুমীয়াত ক’ৰ’নাৰ কথা পাহৰি পেলাইছিল স্বাস্থ্য মন্ত্ৰী ড০ হিমন্ত বিশ্ব শৰ্মাই। আনকি অসমত মাক্স পিন্ধিবলগীয়া পৰিস্থিতি অহা নাই বা তেওঁ নিজেও মাস্ক নিপিন্ধাকৈ গোটেইখন ঘূৰি ফুৰে বুলি দাম্ভিকতাৰে ৰাষ্ট্ৰীয় সংবাদ মাধ্যমৰ আগত মন্তব্য দিছিল।

কিন্তু নিৰ্বাচনী প্ৰচাৰ বা তিনিটা পৰ্য্যায়ৰ ভোটগ্ৰহণ অন্ত পৰাৰ পাছতে অধিক চিৰিয়াছ হৈ পৰিছে স্বাস্থ্যমন্ত্ৰী ড০ হিমন্ত বিশ্ব শৰ্মা।

ব’হাগ বিহু অসমৰ ৰাইজে অতি সুন্দৰকৈ অনুষ্ঠিত কৰিব পাৰিব বুলি ৰাজ্যিক বিজেপিৰ কাৰ্য্যালয়ত এক সংবাদমেল সম্বোধন কৰি মন্ত্ৰীগৰাকীয়ে কেতবোৰ নীতি-নিয়মৰ কথা গাইডলাইন আকাৰত প্ৰকাশ কৰাৰ কথা উল্লেখ কৰে।

নিৰ্বাচনী প্ৰচাৰৰ সময়ত প্ৰিয় নেতাগৰাকীক ওচৰৰ পৰা চাবলৈ জনতাই ভিৰ কৰিছিলহি। তেতিয়া তেওঁলোকে কোনোধৰণৰ কোভিড প্ৰট’কল মানি চলা নাছিল। কোনোধৰণৰ সামাজিক দূৰত্বও দেখা পোৱা নগৈছিল। আনকি মন্ত্ৰী হিমন্ত বিশ্ব শৰ্মাইয়ো হাজাৰ হাজাৰ মানুহৰ উপস্থিতিত সভা অনুষ্ঠিত কৰাৰ লগতে তেওঁৰ জনপ্ৰিয়তা প্ৰদৰ্শনৰ বাবে প্ৰায় সকলোবোৰ সমষ্টিতে ৰোডশ্ব’ কৰিছিল য’ত নেকি তেওঁ প্ৰদৰ্শন কৰিছিল কোভিডক লৈ তেওঁ কোনো প্ৰকাৰেই চিন্তিত নহয়।

কিন্তু নিৰ্বাচন পাৰ হৈ যোৱাৰ পাছতে অসমীয়াৰ বাপতি সাহোন ব’হাগ বিহু অহাৰ লগে লগে হঠাৎ অধিক চিৰিয়াছ হৈ পৰিল স্বাস্থ্যমন্ত্ৰীগৰাকী আৰু বিহু পালনৰ ক্ষেত্ৰত সামাজিক দূৰত্বৰ কথা উল্লেখ কৰিলে মন্ত্ৰীগৰাকীয়ে।

বিহু কেনেকৈ পালন কৰিব লাগে তাৰ এখন SOP প্ৰস্তুত কৰা হ’ব বুলি উল্লেখ কৰি মন্ত্ৰী শৰ্মাই সংবাদমেলত কয়, ‘ৰাতি ১২ বজালৈকে বিহু অনুষ্ঠিত কৰিব লাগে। বিহু কমিটিয়ে চকীসমূহ সামাজিক দূৰত্ব মানি সজাব লাগে।‘

অৱশ্যে, কোনোধৰণৰ লকডাউন বা নাইট কাৰ্ফিউ অসমত নহয় বুলি উল্লেখ কৰে হিমন্তই।

স্বাস্থ্যমন্ত্ৰীগৰাকীৰ মতে ‘বিহুটো যাতে সুকলমে অনুষ্ঠিত কৰিব পাৰে তাৰ বাবে দৈনিক ১ লাখকৈ কোভিড টেষ্ট কৰোৱা হ’ব।‘

মন্ত্ৰীগৰাকীৰ নিজ মুখৰে প্ৰকাশ পোৱা তথ্য অনুসৰি ‘নিৰ্বাচনৰ পূৰ্বে দৈনিক ৭০০০-৮০০০ কোভিড টেষ্ট কৰোৱা হৈছিল আৰু আজিৰে পৰা ৩৫ হাজাৰ টেষ্ট কৰোৱাৰ ব্যৱস্থা কৰা হ’ব আৰু পৰ্য্যায়ক্ৰমে দৈনিক ১ লাখ টেষ্ট কৰোৱা হ’ব যাতে বিহুটো সুকলমে অনুষ্ঠিত কৰিব পাৰে।‘

সাধাৰণ মানুহৰ মনত প্ৰশ্ন হৈছে, ‘নিৰ্বাচনী প্ৰচাৰত ক’ৰ’না নহয় নেকি? বা বিহু অনুষ্ঠিত কৰিলেহে ক’ৰ’না হ’ব নেকি? নিৰ্বাচনী প্ৰচাৰত সামাজিক দুৰত্বৰ কথা উল্লেখ নকৰা মন্ত্ৰীজনে বিহুৰ সময়তহে কিয় সামাজিক দূৰত্বৰ কথা উল্লেখ কৰিলে?