এতিয়াৰে পৰা ৰাজহুৱা স্থানত পিক পেলোৱা বন্ধ কৰক; মাস্ক পিন্ধক : নিয়ম উলংঘা কৰিলে ভুগিব লাগিব শাস্তি!

ৰাজহুৱা স্থানত পিকুৱা নিষিদ্ধ কৰাৰ লগতে মাস্ক পৰিধান কৰাতো বাধ্যতামূলক কৰিছে ধুবুৰী জিলা প্ৰশাসনে।

ধুবুৰী জিলা দণ্ডাধীশ দেৱ কুমাৰ কলিতাৰ স্বাক্ষৰিত এক নিৰ্দেশনাত ৰাজহুৱা স্থানত পিক পেলোৱাতো সম্পূৰ্ণৰূপে নিষিদ্ধ কৰা হৈছে। এই নিৰ্দেশ অমান্য কৰা লোকক বৃহৎ পৰিমাণৰ জৰিমনা বিহা হ’ব বুলি কোৱা হৈছে নিৰ্দেশনাটোত।

নিৰ্দেশনাটোত লগতে কোৱা হৈছে যে ৰাজ্যজুৰি পুনৰ কৰোনা ভাইৰাছৰ সংক্ৰমণ বৃদ্ধি পোৱালৈ লক্ষ্য ৰাখি এই সংক্ৰমণ নিয়ন্ত্ৰণৰ বাবে ৰাজ্যৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই জাৰি কৰা নিৰ্দেশনাৰ ভিত্তিত ৰাজ্যিক স্বাস্থ্য বিভাগৰ নতুন নিৰ্দেশনা অনুসৰি সুৰা, গুটকা, ধঁপাত আদিৰ বিক্ৰীৰ ক্ষেত্ৰত জিলাখনত কঠোৰ নিষেধাজ্ঞা প্ৰয়োগ কৰা হ’ব।

ঘৰৰ পৰা বাহিৰলৈ ওলোৱা প্ৰতিগৰাকী লোকেই মাস্ক পৰিধান কৰাতো বাধ্যতামূলক কৰা হৈছে বুলিও নিৰ্দেশনাটোত কোৱা হৈছে।

নিৰ্দেশনাটোৰ মতে তাৎক্ষণিকভাৱে কাৰ্যকৰী কৰা এই নিৰ্দেশ উলংঘা কৰা লোকসকলক ডিএম আইনৰ ধাৰা ৫১ আৰু ভাৰতীয় দণ্ডবিধি আইনৰ ধাৰা ১৮৮ অনুসৰি শাস্তিযোগ্য অপৰাধ বুলি বিবেচনা কৰি শাস্তি প্ৰদান কৰা হ’ব।

নিৰ্দেশনাটোত আৰু কোৱা হৈছে যে এই নিয়ম উলংঘা কৰা সকলো ব্যক্তিয়ে উক্ত আইনৰ অধীনত শাস্তি ভোগ কৰিব লগা হোৱাৰ লগতে ১০০০ টকাৰ বৃহৎ পৰিমাণৰ জৰিমনাও ভৰিব লাগিব।

সেয়ে জিলা দণ্ডাধীশে জিলাখনৰ জনসাধাৰণক নিৰ্দেশনাসমূহ মানি চলি জিলা প্ৰশাসনক সহযোগ কৰিবলৈ আহ্বান জনাইছে।