অতি পৰিচিত ভাস্কৰ্য্য শিল্পী দিলীপ ভূষণ শৰ্মাৰ মৃত্যুত মন্ত্ৰী হিমন্ত বিশ্বৰ শোক প্ৰকাশ

অতি পৰিচিত ভাস্কৰ্য্য শিল্পী দিলীপ ভূষণ শৰ্মাৰ মৃত্যুত গভীৰ শোক প্ৰকাশ কৰিছে ৰাজ্যৰ বিত্ত মন্ত্ৰী হিমন্ত বিশ্ব শৰ্মাই।

আজি টুইটাৰৰ জৰিয়তে মন্ত্ৰী শৰ্মাই কয়, ‘ভাস্কৰ্য শিল্পী দিলীপ ভূষণ শৰ্মাৰ আকস্মিক মৃত্যুত গভীৰ শোক প্ৰকাশ কৰিছো। তেওঁ ঐকান্তিকতাৰে শিল্প-ভাস্কৰ্য জগতলৈ অলেখ অৱদান আগবঢ়াই গৈছে’।

তেওঁ লগতে কয়, ‘যোগ মুদ্ৰাৰ এক ভাস্কৰ্য নিৰ্মাণ কৰি তেওঁ আমাক উপহাৰ দিছিল, এই মৰম কেতিয়াও পাহৰিব নোৱাৰিম।সৃষ্টিৰাজিয়ে তেওঁক আমাৰ মানস পটত জীয়াই ৰাখিব’।

ভাস্কৰ্য্য শিল্পী দিলীপ ভূষণ শৰ্মাৰ আকস্মিক মৃত্যুত গভীৰ শোক প্ৰকাশ কৰিছোঁ।তেওঁ ঐকান্তিকতাৰে শিল্প- ভাস্কৰ্য্য জগতলৈ অলেখ অৱদান আগবঢ়াই গৈছে।যোগ মুদ্ৰাৰ এক ভাস্কৰ্য্য নিৰ্মাণ কৰি তেওঁ আমাক উপহাৰ দিছিল,এই মৰম কেতিয়াও পাহৰিব নোৱাৰিম।সৃষ্টিৰাজিয়ে তেঁওক আমাৰ মানস পটত জীয়াই ৰাখিব। pic.twitter.com/ebS9NRQo5g

— Himanta Biswa Sarma (@himantabiswa) October 14, 2019

উল্লেখ্য যে দেওবাৰে পুৱা গুৱাহাটীৰ ছাৰ্ভেস্থিত নিজ বাসগৃহত ৪৩ বছৰীয়া তৰুণ ভাস্কৰ্য শিল্পীজনৰ মৃত্যু হয়। জন্মৰ পৰাই হৃদ যন্ত্ৰৰ জটিল ৰোগত আক্ৰান্ত হৈ সুদীৰ্ঘ দিন ধৰি তেওঁ চিকিৎসাধীন হৈ আছিল।

১৯৭৬ চনৰ ১২ আগষ্টত জন্মগ্ৰহণ কৰা শৰ্মাই অতি কম দিনৰ ভিতৰতে নিজৰ শিল্প কৰ্মৰ প্ৰতিভাৰে জনপ্ৰিয় হৈ পৰিছিল।

সুধাকণ্ঠ ভূপেন হাজৰিকাৰ জালুকবাৰীস্থিত সমাধিস্থলীত থকা ভূপেন হাজৰিকাৰ প্ৰতিমূৰ্তি নিৰ্মাণ, দিল্লীস্থিত অসম ভৱনৰ বহিৰ্বিভাগৰ দেৱালত ভাস্কৰ্য শিল্প স্থাপন কৰি দেশ, বিদেশৰ পৰ্যটকৰ লগতে প্ৰশাসনৰ পৰা সন্মান লাভ কৰিছিল।

ইয়াৰ উপৰি তেওঁ দিল্লীৰ গান্ধী মণ্ডপ, কাজিৰঙা ৰাষ্ট্ৰীয় উদ্যানৰ তোৰণ নিৰ্মাণৰ লগতে অসমৰ বিভিন্ন ঠাইৰ পৰ্যটনস্থলীত নিজৰ শিল্পকৰ্মৰ চিন এৰি থৈ যায়।

ইফালে দিলীপ ভূষণ শৰ্মাৰ মৃত্যু শিল্প জগতৰ বাবে অপূৰণীয় ক্ষতি বুলি মন্তব্য কৰিছে মুখ্য মন্ত্ৰী সৰ্বানন্দ সোণোৱালে। মুখ্য মন্ত্ৰীয়ে শিল্পী গৰাকীৰ বিদেহ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনোৱাৰ লগতে শোকসন্তপ্ত পৰিয়ালবৰ্গলৈও গভীৰ সমবেদনা জ্ঞাপন কৰে।