দেশত এদিনতে ক’ৰ’নাত আক্ৰান্ত ৩ লক্ষাধিক লোক, কেন্দ্ৰীয় গৃহমন্ত্ৰী অমিত শ্বাহ ব্যস্ত বংগৰ নিৰ্বাচনী প্ৰচাৰত!

কোভিড পৰিস্থিতিয়ে দেশত কালান্ত ৰূপ ধাৰণ কৰাৰ সময়তো কেৱল ৰাজনৈতিক স্বাৰ্থ পূৰণৰ বাবেই লাখ লাখ লোকক এতিয়া বিপদৰ মাজলৈ ঠেলি দিছে বিজেপিয়ে।

পশ্চিম বংগ বিধান সভাৰ নিৰ্বাচনত কংগ্ৰেছ, তৃণমূল কংগ্ৰেছ আদিৰ দৰে দলে নিৰ্বাচনী প্ৰচাৰ সভা বন্ধ কৰিবলৈ সিদ্ধান্ত গ্ৰহণ কৰাৰ সময়তে বিজেপিৰ জ্যেষ্ঠ নেতা তথা কেন্দ্ৰীয় গৃহমন্ত্ৰী অমিত শ্বাহে আজিৰ দিনটোতেো বংগৰ তিনিটা স্থানত নিৰ্বাচনী প্ৰচাৰৰ বাবে সাজু হয়।

সেই মৰ্মে অমিত শ্বাহে আজি হৰিৰামপুৰ, গজলে আৰু  পূৱ দুৰ্গাপুৰৰ তিনি খনকৈ নিৰ্বাচনী জনসভাত ভাগ ল’ব বুলি দলীয় সূত্ৰই প্ৰকাশ কৰিছে।

অমিত শ্বাহৰ নিৰ্বাচনী প্ৰচাৰৰ হৰ্ডিং বংগৰ বিভিন্ন স্থানত জিলিকি থকা দেখিবলৈ পোৱা গৈছে।

কলকাতা উচ্চ ন্যায়ালয়েও আজি আনকি ৰাজ্য খনৰ নিৰ্বাচন আয়োগক ক্ষমতা থাকিও কোভিড পৰিস্থিতিত জনসভাৰ ক্ষেত্ৰত হস্তক্ষেপ কৰিব নোৱাৰাৰ বাবে সমালোচনা কৰিছে।

উল্লেখ্য দেশত কৰ’নাৰ সংক্ৰমণ এনেদৰে বৃদ্ধি পাইছে যে ই দৈনিক সংক্ৰমণৰ ক্ষেত্ৰত আমেৰিকাৰ ৰেকৰ্ডো ভংগ কৰিলে।

যোৱা ২৪ ঘন্টাত দেশত এদিনত সৰ্বাধিক আক্ৰান্তৰ ৰেকৰ্ড হৈছে। বুধবাৰে বিশ্বৰ সকলো ৰেকৰ্ড ভংগ কৰি প্ৰায় ৩লাখ ১৪হাজাৰ লোক কৰ’নাত আক্ৰান্ত হৈছে।

দেশত কৰ’না ভাইৰাছৰ সংক্ৰমণ ঘটাৰ পাছত এই প্ৰথমবাৰ দৈনিক আক্ৰান্তৰ সংখ্যাই ৩লাখ অতিক্ৰম কৰিলে।

কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি বিগত ২৪ ঘন্টাত দেশত ৩লাখ ১৪হাজাৰ ৮৩৫জন লোক কৰ’নাত আক্ৰান্ত হৈছে। এয়া দৈনিক সংক্ৰমণৰ ক্ষেত্ৰত বিশ্বৰ ভিতৰতে সৰ্বাধক।

উল্লেখ্য যে ইয়াৰ পূৰ্বে চলিত বছৰৰ যোৱা ৮জানুৱাৰীত আমেৰিকাত এদিনত সৰ্বাধিক ৩লাখ ৭হাজাৰ ৫৮১জন লোক আক্ৰান্ত হৈছিল। ভাৰতে সেই ৰেকৰ্ড ভংগ কৰিলে।

যোৱা ৪এপ্ৰিলত দেশত ২৪ঘন্টাত আক্ৰান্ত হৈছিল ১লাখ লোক। কিন্তু মাত্ৰ ১৭দিনৰ মূৰত আক্ৰান্তৰ সংখ্যা অতি দ্ৰুতভাৱে বৃদ্ধি পাই ৩লাখ অতিক্ৰম কৰিলে।

দেশত দৈনিক আক্ৰান্তৰ হাৰ ৬.৭৬শতাংশ গতিতি বৃদ্ধি পাইছে যিটো আমেৰিকাতকৈ চাৰিগুণ অধিক।

বিগত ২৪ ঘন্টাত দেশত ২হাজাৰ ১০৪জন লোকৰ কৰ’নাত মৃত্যু হৈছে। দেশত এতিয়া মুঠ মৃত্যুৰ সংখ্যা ১লাখ ৮৪হাজাৰ ৬৫৭জনলৈ বৃদ্ধি পাইছে।

সেইদৰে দেশত মুঠ আক্ৰান্ত সংখ্যা হৈছেগৈ ১কোটি ৫৯লাখ ৩০হাজাৰ ৯৬৫জন।