চুমিলা ৰংহাংপীৰ হত্যাকাণ্ড : দোষীক কঠোৰ শাস্তিৰ লগতে শিশু শ্ৰমিকক ন্যায় প্ৰদানৰ দাবী ‘আইছা’ৰ

পশ্চিম কাৰ্বি আংলং জিলাৰ বৈঠালংছু থানাৰ অন্তৰ্গত কুদাম ৰংহাংগীৱৰ নিৱাসী চাৰ্থে ৰংহাং আৰু বাচাপী ক্ৰ’পীৰ জীয়ৰী চুমিলা ৰংহাংপীক ৰহা খাইগড়ৰ নিৱাসী প্ৰকাশ বৰঠাকুৰৰ ঘৰত নৃশংসভাৱে জ্বলাই হত্যা কৰা কাৰ্যক নিখিল ভাৰত ছাত্ৰ সন্থা (AISA)ই তীব্ৰ ভাষাৰে গৰিহণা দিছে আৰু অভিযুক্তক দৃষ্টাস্তমূলক শাস্তি বিহাৰ দাবী জনাইছে।

সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিৰ জৰিয়তে ছাত্ৰ সংগনটোৱে জনজাতীয় এলেকাসমূহৰ পৰা নিৰক্ষৰ ল’ৰা-ছোৱালীবোৰক কাম কৰা শ্রমিক হিচাপে একাংশ লোকে ব্যৱহাৰ কৰাৰ বিৰুদ্ধে ৰাজ্য প্ৰশাসনক বিশেষভাৱে সষ্টম হ’বলৈ দাবী জনাইছে।

এক প্ৰেছ বিজ্ঞপ্তিটোত সংগঠনটোৰ অসম ৰাজ্যিক সমিতিৰ সভাপতি সুব্ৰত তালুকদাৰ আৰু সম্পাদক ধনঞ্জয় দাসে কয় যে চুমিলা ৰংহাংপীৰ নৃশংস হত্যাকাণ্ডটোৱে শেহতীয়াভাৱে ৰাজ্যত অসংখ্য শিশু শ্রমিকক কিছু সংখ্যক লোকে অতি অন্যায়ভাৱে নিয়োজিত কৰি ৰখাৰ আৰু এওঁলোকৰ জীৱনৰ নিৰাপত্তাৰ ক্ষেত্ৰত ৰাজ্য চৰকাৰৰ ব্যৰ্থতাৰ নিষ্ঠুৰ ছবিখন পোহৰলৈ আনিছে।

আইনৰ বাধা আৰু নিৰ্দেশনাৱলীৰ বিপৰীতে একাংশ নাগৰিকে দীৰ্ঘদিন ধৰি দুখীয়া সম্প্ৰদায় আৰু শ্ৰেণীৰ শিশুসকলক শ্রমিক হিচাপে আন আন আনুসঙ্গিক উপায় দোহাই ব্যৱসায়, ঘৰুৱা কামত নিয়োজিত কৰাই আহিছে বুলিও অভিযোগ কৰিছে ছাত্ৰ সংগঠনটোৱে।

আইনী অপৰাধৰ পৰা বাচি থকাৰ উপায় হিচাপে সামান্য অমনোযোগী পঢ়াশালীত এনে শিশুসকলক নামভৰ্ত্তি কৰি ৰাখি আঢ্যৱন্ত লোকসকলে প্রকৃততে শিশু শ্ৰম বা বনকৰা আহিলা হিচাপেহে শিশু বা তেনে দুখীয়া সম্তানসকলক ব্যৱহাৰ কৰি আহিছে।

এই সমগ্ৰ ব্যৱস্থাটো এখন সুষ্ঠ আৰু সবল-সভ্য সমাজ আৰু নাগৰিকৰ বাবে প্ৰকৃতে নিৰ্লজ্জকৰ আৰ্হি বুলি মন্তব্য কৰি ছাত্ৰ সংগঠনটোৰ নেতাদ্বয়ে মানৱীয় আৰু আইনী আওঁতাৰ জৰিয়তে নিয়োজিত আৰু ব্যৱহৃত হৈ থকা দুখীয়া শিশু, বনকৰা ল’ৰ-ছোৱালীবোৰক নিজ-নিজ গৃহলৈ প্ৰত্যাপন কৰাই সমাজৰ সুস্থিৰ বাতাবৰণ আৰু মানৱীয় দৃষ্টিভঙ্গী অটুত ৰখাৰ কাৰণে আৰু অনগ্ৰসৰ আৰু অৱহেলিত অঞ্চলবোৰত শিক্ষা আৰু স্বাস্থ্যৰ সুবিধা পৰ্যাপ্ত কৰিবলৈ ৰাজ্য প্ৰশাসনক দাবী জনাইছে।

ছাত্ৰ সংগঠনটোৱে লগতে মৃত দুৰ্ভগীয়া চুমিলা ৰংহাংপীৰ হত্যা কৰা দোষীক কঠোৰ শাস্তি প্ৰদানৰ লগতে দুখীয়া পৰিয়ালটোৰ সমস্ত দায়িত্ব প্ৰশানক ল’বলৈও আহ্বান জনাইছে।