ড্ৰাগছে প্ৰাণ ল’লে এজন যুৱকৰ; হাজোৰ দামপুৰত চাঞ্চল্য

মহাব্যাধি ড্ৰাগছে প্ৰাণ ল’লে আৰু এজন যুৱকৰ। হাজোৰ দামপুৰত সংঘটিত হৈছে এই চাঞ্চল্যকৰ ঘটনা। ড্ৰাগছ সেৱন কৰি থকা অৱস্থাত ঘটনাস্থলীতেই মৃত্যু হ’ল শুৱালকুছিৰ বামুণ বাঘেৰীচুপৰ যুৱক কুশল শৰ্মাৰ।

আনহাতে, ঘটনাস্থলীৰ পৰা আৰক্ষীয়ে আটক কৰিছে শুৱালকুছি নপাৰাৰ সংগ্ৰাম বৈশ্য নামৰ আন এজন ড্ৰাগছ আসক্ত যুৱকক।

এই ঘটনাৰ পাছতেই এতিয়া স্থানীয় ৰাইজে মৃত কুশল শৰ্মা আৰু আটকাধীন সংগ্ৰাম বৈশ্যই নিজে ড্ৰাগছ সেৱন কৰাৰ লগতে হাজোৰ দামপুৰ অঞ্চলৰ পৰা ক্ৰয় কৰি ব্যৱসায় চলাই থকাৰো অভিযোগ উত্থাপন কৰিছে।

ঘটনা অনুসৰি, দেওবাৰে সন্ধিয়া দুয়োজন যুৱকে ড্ৰাগছ সংগ্ৰহ কৰি দামপুৰৰ পূব খাণ্ডাপাৰ প্ৰাথমিক বিদ্যালয়ৰ সমীপত সেৱন কৰি আছিল। তেনে সময়তে হঠাৎ ঢলি পৰিছিল কুশল শৰ্মা।

তাৰ পিছতেই একাংশ স্থানীয় লোকে যুৱকজনক চিকিৎসালয়লৈ নিয়াৰ চেষ্টা চলাই যদিও যুৱকজনৰ ঘটনাস্থলীতেই মৃত্যু হয়।

এই চাঞ্চল্যকৰ ঘটনাৰ পাছতেই হাজো আৰক্ষী ঘটনাস্থলীত উপস্থিত হৈ তদন্ত আৰম্ভ কৰাৰ লগতে মৃত কুশল শৰ্মাৰ মৃতদেহ উদ্ধাৰ কৰে আৰু আনজন ড্ৰাগছ আসক্ত সংগ্ৰাম বৈশ্যক সোধপোছৰ বাবে আটক কৰে ।

উল্লেখ্য যে, দিনক দিনে হাজো অঞ্চলত বৃদ্ধি পাই অহা ড্ৰাগছৰ ৰমৰমীয়া বেহাই এতিয়া বহু যুৱকক ধ্বংসৰ গৰাহলৈ ঠেলি দিয়াৰ লগতে প্ৰাণ লৈছে অনেকজনৰ।