দিল্লীত অসমৰ জ্যেষ্ঠ সাংবাদিক নীলাক্ষী ভট্টাচাৰ্যৰ কৰ’নাত মৃত্যু; গুৱাহাটী প্ৰেছ ক্লাৱৰ শোক প্ৰকাশ

দেশত কৰ’না ভাইৰাছৰ ভয়ংকৰ সংক্ৰমণৰ মাজতে অসমৰ বাবে এটা বেয়া খৱৰ। দিল্লীত অসমৰ এগৰাকী জ্যেষ্ঠ সাংবাদিক নীলাক্ষী ভট্টাচাৰ্যৰ কোভিড-১৯ত আক্ৰান্ত হৈ মৃত্যু হৈছে।

দিল্লীৰ প্ৰতীক্ষা হাস্পাতালত চিকিৎসাধীন অৱস্থাত শুকুৰবাৰে পুৱা টাইমছ অফ ইণ্ডিয়াৰ সাংবাদিক ভট্টাচাৰ্যই শেষ নিশ্বাস ত্যাগ কৰে।

আনহাতে, নীলাক্ষীৰ ভট্টাচাৰ্যৰ স্বামী দ্য আছাম ট্ৰিবিউন কাকতৰ দিল্লীত থকা জ্যেষ্ঠ সাংবাদিক কল্যান বৰুৱাও কৰ’নাত আক্ৰান্ত হৈ চিকিৎসাধীন হৈ আছে।

মৃত্যুৰ সময়ত নীলাক্ষী ভট্টাচাৰ্যই স্বামী কল্যান বৰুৱাৰ লগতে একমাত্ৰ কন্যাক এৰি গৈছে। নীলাক্ষীৰ এনে অকাল মৃত্যুত ৰাজ্যখনত শোকৰ ছাঁ পৰিছে।

উল্লেখ্য যে নীলাক্ষী ভট্টাচাৰ্য এগৰাকী পৰ্বতাৰোহীও আছিল। গুৱাহাটীৰ দুঃসাহসিক ক্ৰীড়া সংগঠন অক্সপ্ল’ৰাৰ্ছৰো প্ৰতিষ্ঠাপক সদস্য আছিল। তেওঁৰ মৃত্যুত সংগঠনটোৱে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে।

ইপিনে,জ্যেষ্ঠ সাংবাদিক নীলাক্ষী ভট্টাচাৰ্যৰ অকাল মৃত্যুত গুৱাহাটী প্ৰেছ ক্লাৱেও শোক প্ৰকাশ কৰিছে।

এক বিজ্ঞপ্তিত সাংবাদিক গৰাকীৰ মৃত্যুত শোক প্ৰকাশ কৰি গুৱাহাটী প্ৰেছ ক্লাৱে কয়, ’’কাল কৰোনাই পুনৰ প্ৰাণ কাঢ়ি ল’লে অসমৰ এগৰাকী সাংবাদিকৰ। দিল্লীত টাইমছ অব ইণ্ডিয়া গ্ৰুপত কৰ্মৰত নীলাক্ষী ভট্টাচাৰ্যৰ মৃত্যুত মৰ্মাহত গুৱাহাটী প্ৰেছ ক্লাব। দুঃসাহসিক ক্ৰীড়াৰ সৈতেও জড়িত নীলাক্ষী ভট্টাচাৰ্যৰ মৃত্যু এক অপুৰণীয় ক্ষতি। প্ৰয়াত সাংবাদিকগৰাকীৰ অকাল বিয়োগত গুৱাহাটী প্ৰেছ ক্লাবে গভীৰ শোক প্ৰকাশ কৰাৰ লগতে শোক- সন্তপ্ত পৰিয়াললৈ জনাইছে সমবেদনা।‘’

আনহাতে, নীলাক্ষীৰ স্বামী সাংবাদিক কল্যান বৰুৱাৰ আশু আৰোগ্য কামনা কৰি গুৱাহাটী প্ৰেছ ক্লাৱে কয়, ’’এনে এক সংকটপূৰ্ণ সময়ত সদ্য প্ৰয়াত নীলাক্ষী ভট্টাচাৰ্যৰ স্বামী কল্যান বৰুৱাও কোভিড-১৯ত আক্ৰান্ত হৈ গুৰুতভাৱে অসুস্থ। আছাম ট্ৰিবিউন কাকতৰ দিল্লীৰ জ্যেষ্ঠ সাংবাদিক হিচাপে কৰ্মৰত কল্যান বৰুৱাৰ আশু-আৰোগ্য কামনা কৰিলোঁ। পৰিয়ালটোৰ এই কঠিন সময়ত সম্ভৱপৰ সকলো সহায় আগবঢ়াব বাবে সাজু গুৱাহাটী প্ৰেছ ক্লাব।‘’