বগীবিল দলঙৰ নিৰ্মাণ কাৰ্যৰ কাম-কাজ পৰিদৰ্শন ৰাজ্যিক পৰ্যায়ৰ ৰে’ল মন্ত্ৰী ৰাজেন গোহাঁইৰ

ৰাজ্যিক ৰে’ল মন্ত্ৰী ৰাজেন গোহাঁইয়ে  দেওবাৰে বগীবিল দলঙৰ নিৰ্মাণ কাৰ্যৰ কাম-কাজ পৰিদৰ্শন কৰি ৰে’লৱে কৰ্তৃপক্ষক দলংখন নিৰ্মাণৰ গতি দ্ৰুত কৰিবলৈ নিৰ্দেশ দিয়ে, যাতে নিৰ্ধাৰিত সময়ত দলংখন মুকলি কৰিব পৰা যায়।

 ৰে’ল মন্ত্ৰী গৰাকীয়ে ডিব্ৰুগড় জিলাৰ সাংসদ ৰামেশ্বৰ তেলী আৰু জ্যেষ্ঠ ৰে’লৱে বিষয়াক লগত লৈ ডিব্ৰুগড়ৰ চহৰৰ পৰা ১৭ কি. মি. ভটিয়নিত থকা বগীবিল প্ৰকল্পটোৰ কাম-কাজৰ বুজ লয়।

উল্লেখযোগ্য যে ঠিকাদাৰ সকলৰ মাজত চলি থকা কিছু বাদ-বিবাদৰ বাবে দলঙৰ নিৰ্মাণ কাৰ্য যোৱা চাৰি দিন ধৰি সম্পূৰ্ণভাৱে স্থবিৰ হৈ আছিল। সেয়ে মন্ত্ৰী গৰাকীয়ে আজি ডিব্ৰুগড় জিলা প্ৰশাসনৰ বিষয়া আৰু এন এফ ৰে’লৱেৰ বিষয়া সকল, নিৰ্মাণ কোম্পানি হিন্দুস্তান কন্ষ্ট্ৰাকচন কোম্পানিৰ প্ৰতিনিধি তথা ঠিকাদাৰ সকলৰ সৈতে এক বৈঠকত মিলিত হৈ উক্ত বিষয়টোৰ মীমাংসা কৰাৰ চেষ্টা কৰে। বৈঠকত তেওঁলোকৰ মাজত থকা বিবাদৰ অৱসান ঘটাই পাৰস্পৰিক বুজাবুজি কৰি নিৰ্মাণ কাৰ্যৰ কাম পুনৰ আৰম্ভ কৰাৰ সিদ্ধান্ত গ্ৰহণ কৰা হয়।

আনহাতে বৈঠকতে মন্ত্ৰী গৰাকীয়ে ৰে’লৱে বিষয়াক ঠিকাদাৰ সকলৰ বিৰুদ্ধে ৰুজু কৰা গোচৰ উঠাই ল’বলৈ নিৰ্দেশ দিয়ে।

বৈঠকতে ৰে’লৱে মন্ত্ৰী গৰাকীয়ে কয় যে, ‘মই বিভাগীয় ৰে’লৱে বিষয়াক নিৰ্মাণ কাৰ্য ক্ষীপ্ৰ গতিত কৰি নিৰ্ধাৰিত সময়ৰ ভিতৰত সম্পূৰ্ণ কৰাৰ বাবে নিৰ্দেশ দিছো। বিভাগীয় বিষয়াই মোক দলঙৰ নিৰ্মাণ কাৰ্য কাম ৯৫ শতাংশ সম্পূৰ্ণ হৈ উঠা বুলি অৱগত কৰে। মই দলঙৰ নিৰ্মাণ কাৰ্য জুলাই মাহৰ ভিতৰত সম্পূৰ্ণ হ’ব বুলি আশা কৰিছো।’

আজিৰ বৈঠকত ডিব্ৰুগড় জিলা উপায়ুক্ত লয়া মাদুৰী, উত্তৰ-পূব ৰে’লৱেৰ মহাপ্ৰবন্ধক মহেশ কুমাৰ গুপ্তা, ৰে’লৱে ব’ৰ্ডৰ সদস্য সকল উপস্থিত থাকে।