কোভিড-১৯ত আক্ৰান্ত হৈ কলিয়াবৰত প্ৰথমজন ৰোগীৰ মৃত্যু; যোৱা ২৪ ঘন্টাত ৬৪জন আক্ৰান্ত

মাৰাত্মক কোভিড-১৯ত আক্ৰান্ত হৈ কলিয়াবৰত প্ৰথমজন ৰোগীৰ মৃত্যু ঘটিছে।

মৃত ব্যক্তিজন কলিয়াবৰৰ দলগাঁৱৰ সাগৰ শইকীয়া। মুম্বাইৰ ব্যক্তিগত কোম্পানী এটাত কৰ্মৰত আছিল ব্যক্তিজন।

কিছুদিন পূৰ্বে মুম্বাইৰ পৰা গুৱাহাটীলৈ আহিছিল শইকীয়া। গুৱাহাটীত কোভিড টেষ্ট কৰোতে তেওঁৰ পজিটিভ ধৰা পৰিছিল।

তাৰপাছতেই তেওঁ হোম আইচছ’লেশ্যন লৈ কলিয়াবৰৰ দলগাঁৱৰ ঘৰত আহি আছিল। জখলাবন্ধা হাস্পতালৰ তত্বাৱধানত ঘৰতে হোম আইচছ’লেশ্যন আছিল।

কিন্তু স্বাস্থ্য বিভাগে জনোৱা মতে ব্যক্তিজনে স্বাস্থ্য বিভাগৰ নীতি-নিয়ম সমূহ মনা নাছিল। ৯ দিনত কৰিব লগা পুনৰ কোভিড টেষ্টো ব্যক্তিজনে কৰা নাছিল।

শনিবাৰে সাগৰ শইকীয়াৰ মৃত্যু হয়। কিন্তু শইকীয়া স্বাস্থ্যৰ কোনো অৱনতি হোৱা নাছিল বুলি জানিবলৈ দিয়ে স্বাস্থ্য বিভাগে।

ইপিনে, বিগত ২৪ ঘন্টাত কলিয়াবৰত নতুনকৈ ৬৪ জন লোক কোভিড-১৯ত আক্ৰান্ত হৈছে।

জখলাবন্ধা চিকিৎসালয় আৰু জখলাবন্ধা চিকিৎসালয়ৰ সৈতে জড়িত অন্য চাৰিটা কোভিড টেষ্ট কেন্দ্ৰত শনিবাৰে ৪১ জন লোক কোভিড পজিটিভ চিনাক্ত হয়।

আক্ৰান্ত আটাইকেইজন ব্যক্তিকে হোম আইচছ’লেশ্যনত থাকিবলৈ পৰামৰ্শ দিয়ে স্বাস্থ্য বিভাগে।

আনহাতে, চিমনাবস্তি চিকিৎসালয়ৰ কোভিড চেন্টাৰৰ সৈতে জড়িত আন চাৰিটা কোভিড টেষ্ট কেন্দ্ৰত কৰা টেষ্টত ২৩ জন লোকৰ কোভিড পজিটিভ ধৰা পৰে।

ইয়াৰে আক্ৰান্ত ১৮ জনক স্থানীয় বাগান চিকিৎসালয় সমূহত ভৰ্তি কৰোৱা হয়। আন ৫ জনক হোম আইচছ’লেশ্যনত থকাৰ নিৰ্দেশ দিয়া হৈছে।

এতিয়ালৈ কলিয়াবৰত কোভিড-১৯ত আক্ৰান্তৰ মুঠ সংখ্যা  ৪৫৪ লৈ বৃদ্ধি পালে।

ইয়াৰে সুস্থ হৈ উঠিছে ২৬২ গৰাকী আৰু সক্ৰিয় ৰোগীৰ সংখ্যা হৈছে ১৯২ গৰাকী। বৰ্তমান হাস্পতালত চিকিৎসাধীন ৪৬ গৰাকী আক্ৰান্ত ৰোগী।