মহানগৰীৰ স্পেনিছ গাৰ্ডেনত ঘোষ ব্ৰাডাৰ্ছৰ স্বত্বাধিকাৰীৰ ঘৰত চিবিআইৰ অভিযান

মহানগৰীৰ জুৰোডস্থিত বিলাসী এপাৰ্টমেন্ট স্পেনিছ গাৰ্ডেনত আজি  চিবিআইয়ে অভিযান চলায়। এপাৰ্টমেণ্টটোৰ দশম মহলাৰ ‘বি’ ব্লকত চলায় এই অভিযান। ঘোষ ব্ৰাডাৰ্ছৰ স্বত্বাধিকাৰীৰ ঘৰত এইদৰে অভিযান চলোৱা হয়।

চিবিআইয়ে পূৰ্বৰ এক বেংক জালিয়াতিৰ গোচৰৰ ভিত্তিত আজি এই অভিযান চলাইছিল।

জুন মাহৰ প্ৰথম ভাগতে কেন্দ্ৰীয় অনুসন্ধান সংস্থা (চিবিআই)ই ঘোষ ব্ৰাডাৰ্ছৰ চাৰিগৰাকী প্ৰম’টাৰ-ডিৰেক্টৰৰ লগতে এগৰাকী চাৰ্টাৰ্ড একাউন্টটেন্ট, অজ্ঞাত বেংক বিষয়া আৰু আন ব্যক্তিৰ বিৰুদ্ধে আইডিবিআই বেংকৰ ১৬৮.৬২ কোটি টকা লোকচান কৰাৰ অভিযোগত এটা গোচৰ ৰুজু কৰিছিল।

অভিযুক্ত কেইগৰাকীৰ ভিতৰত প্ৰনব কুমাৰ ঘোষ, প্ৰতুল কুমাৰ ঘোষ, গীতা ৰাণী ঘোষ আৰু প্ৰবীৰ কুমাৰ ঘোষ এই আটাই কেইগৰাকীয়ে ঘোষ ব্ৰাডাৰ্ছ অটোমবাইলছৰ প্ৰম’টাৰ-ডিৰেক্টৰ।

তদুপৰি, তেওঁলোকৰ লগতে চাৰ্টাৰ্ড একাউন্টেন্ট অৰুণাভ চট্টোপাধ্যায় আৰু অজ্ঞাত বেংক বিষয়া তথা আন ব্যক্তিৰ বিৰুদ্ধেও গোচৰ ৰুজু কৰা হৈছিল।

অভিযোগ অনুসৰি, গুৱাহাটীৰ বেতকুছিস্থিত প্ৰাইভেট কোম্পানীটোলৈ গাড়ী ক্ৰয় কৰিবলৈ আইডিবিআই বেংকৰ গুৱাহাটী শাখাৰ পৰা প্ৰায় ৬৪.৬৭কোটি টকাৰ জালিয়াতিৰে টাৰ্ম লোন আৰু কেচ ক্ৰেডিটৰ সুবিধা আগবঢ়োৱা হৈছিল।

আনহাতে, অভিযোগ অনুসৰি অভিযুক্তকেইগৰাকীয়ে ভুৱা নথি দাখিল কৰি লোনৰ সুবিধা গ্ৰহণ কৰিছিল আৰু লগতে অভিযুক্তই তেওঁলোকক যি উদ্দেশ্যত লোন দিছিল তাৰ বিপৰীতে আন কামত ব্যৱহাৰ কৰিছিল আৰু সেইদৰে তেওঁলোকে ৩১মে’ ২০২১লৈ বেংকৰ প্ৰায় ১৬৮.৬২কোটি টকা লোকচান কৰিছে।

যোৱা ২০২০ চনৰ ১ জুলাইলৈ তেওঁলোকৰ অনাদায় ধনৰ পৰিমান আছিল প্ৰায় ১৫৩.৩৮কোটি টকা আৰু সেই একাউন্টটো বেংকৰ পাবলগীয়া ধন আদায় নিদিয়াৰ বাবে নন পাৰ্ফৰ্মিং এছেট (এন পি এ) হৈ পৰিছিল।

চিবিআইয়ে এই গোটেই বিষয়টোৰ তদন্ত অব্যাহত ৰাখিছে আৰু আজি চলোৱা অভিযানো তাৰেই এক অংশ বুলি জানিব পৰা গৈছে।