বঙাইগাঁৱত অবৈধ সুৰাৰ বিৰুদ্ধে আৰক্ষীৰ অভিযান,২৫ কাৰ্টন বিলাতীসুৰাসহ আটক ব্যৱসায়ী

বঙাইগাঁও আৰক্ষীয়ে ড্ৰাগছ ,গাঞ্জা আৰু অবৈধ সুৰাৰ বিৰুদ্ধে অভিযান তীব্ৰতৰ কৰি তুলিছে ৷

এই ধাৰাবাহিক অভিয়ানৰ অংশ হিচাপে বঙাইগাঁও চহৰৰ নিউ বঙাইগাঁও টুনীয়াপাৰত দীৰ্ঘদিন ধৰি বিলাতী সুৰাৰ অবৈধ বেহা চলাই থকা ইন্দ্ৰাচন যাদৱ নামৰ ব্যৱসায়ীজনক আৰক্ষীয়ে হাতে লোটে কৰায়ত্ত কৰে ৷

বঙাইগাঁও জিলাৰ উপ আৰক্ষী অধীক্ষক লুণা সোণোৱালৰ নেতৃত্বত তথা নিউ বঙাইগাঁও আৰক্ষী পহৰা চকীৰ ভাৰপ্ৰাপ্ত আৰক্ষী বিষয়া শিৱপ্ৰসাদ কলিতাৰ সহযোগত চলোৱা অভিযানত আৰক্ষীয়ে ২৫ কাৰ্টন (৫৪৪ বটল) বিভিন্ন ব্ৰেণ্ডৰ বিলাতী সুৰা জব্দ কৰাৰ লগতে এই অবৈধ বেহাৰ লগত জড়িত ইন্দ্ৰাচন যাদৱক আটক কৰে ৷

উল্লেখ্য যে টুনীয়াপাৰৰ ওম ষ্টোৰৰ পাছফালৰ এটা গৃহত দীৰ্ঘদিন ধৰি অবৈধ সুৰাৰ বেহা চলাই আহিছিল এইগৰাকী ইন্দ্ৰাচন যাদৱে ৷

আৰক্ষীয়ে ইয়াৰ পূৰ্বেও এই স্থানত অভিযান চলাইছিল যদিও অবৈধ সুৰাৰ বেহাৰ লগত জড়িত ইন্দ্ৰাচন যাদৱক আটক কৰিবলৈ সক্ষম হোৱা নাছিল৷ কিন্তু এইবাৰ জালত পৰে আৰক্ষীৰ ৷

ইপিনে অভিযান সন্দৰ্ভত উপ আৰক্ষী অধীক্ষকগৰাকীয়ে সংবাদ মাধ্যমৰ আগত কয় যে ৰাইজৰ পোৱা অভিযোগৰ ভিত্তিত আৰক্ষীয়ে এই অভিযান চলাইছিল ৷

বঙাইগাঁও আৰক্ষীয়ে  অসামাজিক কাৰ্যক কেতিয়াও প্ৰশ্ৰয় নিদিয়ে আৰু এনে কাৰ্যৰ লগত জড়িতসকলৰ বিৰুদ্ধে অভিযান চলাই যাব ৷

এনে অসামাজিক কাৰ্যৰ বিৰুদ্ধে অভিযোগ পালেই আৰক্ষীয়ে ব্যৱস্থা গ্ৰহণ কৰিব ৷

অসামাজিক কাৰ্যৰ লগত জড়িত সকলক সকিয়নী দি কয় যে যিসকলে এনে অবৈধ বেহাৰ লগত জড়িত হৈ আছে আতৰি আহক , অন্যথা আৰক্ষীয়ে কাকো ৰেহাই নিদিয়ে ৷

উল্লেখ্য যে ক’ভিড পৰিস্থিতিৰ বাবে সন্ধিয়াৰে পৰা চলি থকা সান্ধ্য আইনৰ মাজতো বঙাইগাঁৱত একাংশই অবৈধভাৱে সুৰাৰ বেহা চলাই আহিছে  ৷ কিন্তু আৰক্ষীয়েও তীব্ৰতৰ কৰি তুলিছে অভিযান ৷