কোটিটকীয়া এটা পথ! নিৰ্মাণৰ দুমাহৰ পিছতেই চিৰা চিৰে ফাটিল স্বয়ং মুখ্যমন্ত্ৰীৰ বিভাগে নিৰ্মাণ কৰা পথটো

নিৰ্মাণৰ দুমাহৰ পিছতেই চিৰা চিৰে ফাটিছে কোটিটকীয়া এটা পথ!  এই পথেৰে এতিয়া যানবাহনৰ পৰিৱৰ্তে নাৱেৰে অহা যোৱা কৰিব লাগে গাওঁবাসীয়ে।

প্ৰায় বিশখন গাওঁ সংযোগী এই পথটো এতিয়া একাঠু পানীৰ তলত। মুখ্যমন্ত্ৰী ড০ হিমন্ত বিশ্ব শৰ্মাৰ বিভাগতে চলিছে পথ নিৰ্মাণত এই দুৰ্নীতি।

বিভাগীয় কৰ্তৃপক্ষ আৰু ঠিকাদাৰে মিলি লুন্ঠন চলোৱাৰ অভিযোগ তুলিছে স্থানীয় ৰাইজ তথা দল সংগঠনে।

শিৱসাগৰ গ্ৰাম্য পথ সংমণ্ডল, লোক নিৰ্মাণ বিভাগৰ অধীনত ঠিকাদাৰ, বি কে মজিকাই নিৰ্মাণ কৰিছে এই পথটো।

শিৱসাগৰৰ পানবেচাৰ চেনীমৰা আৰু অফলা সংগোগী  দিচাং এংবেঙ্কমেন্টৰ পৰা গড়ভঙালৈ নিৰ্মিত প্ৰায় ১.৮৩ কিলোমিটাৰৰ দৈৰ্ঘৰ এই পথটো।

নতুনকৈ নিৰ্মিত এই পথৰ অৱস্থা দেখিলে স্বাভাৱিকতে সকলোৰে চকু কপালত উঠিব।

আজি নৰ্থইষ্ট নাওৰ সাংবাদিক এই বিধ্বস্ত পথত উপস্থিত হৈ দেখা পায় যে পানবেচাৰ চেনীমৰাৰ পৰা এই পথটো বৰ্তমান পানীৰ তলত। পথটোত এতিয়া বাহনৰ পৰিৱৰ্তে নাৱেৰেহে অহা যোৱা কৰিব লাগে।

পথটোত থকা পকী দলংখনৰ দুয়োটা মূৰ খহি পৰিছে। মাত্ৰ দুমাহ পূৰ্বে নিৰ্মাণ কৰা এই পথৰ দুৰৱস্থা নেদেখিলে কোনোৱেই বিশ্বাসেই নকৰিব।

প্ৰায় তিনি কোটি চৌব্বিশ লাখ টকাৰে নিৰ্মাণ কৰা এই পথটো ঠিকাদাৰ বি কে মজিকাই অতি নিম্নমানৰ কাম কৰাৰ বাবেই নিৰ্মাণৰ দুমাহৰ পিছতে এইদৰে জহি খহি বিধ্বস্ত হৈ পৰা বুলি অভিযোগ কৰিছে স্থানীয় ৰাইজে।

স্বাধীনতাৰ পিছতে প্ৰথমবাৰলৈ নিৰ্মাণ হোৱা এই পথটো নিৰ্মাণৰ দুমাহৰ পিছতেই এইদৰে পানীৰ মাজত চিৰাল ফাট দিয়াত জাঙুৰ খাই উঠিছে স্থানীয় ৰাইজৰ লগতে বহুকেইটা মিচিং জনগোষ্ঠীয় দল-সংগঠন।

পথটো অতিশীঘ্ৰে পুনৰ নিৰ্মাণ কৰিবলৈ লোক নিৰ্মাণ বিভাগ আৰু ঠিকাদাৰ গৰাকীক দাবী জনাছে স্থানীয় ৰাইজে। মুখ্যমন্ত্ৰী তথা বিভাগটোৰ দায়িত্ব থকা মন্ত্ৰী ড০ হিমন্ত বিশ্ব শৰ্মাক এই পথ নিৰ্মাণত হোৱা দুৰ্নীতিৰ তদন্ত কৰিবলৈকো দাবী জনাইছে স্থানীয় ৰাইজে।