চাৰি মাহেই নহ’ল; পদত্যাগ কৰিলে উত্তৰাখণ্ডৰ বিজেপি চৰকাৰৰ মুখ্যমন্ত্ৰী তিৰথ সিং ৰাৱাটে

অৱশেষত চলি থকা চৰ্চাৰ অন্ত পেলাই শুকুৰবাৰে নিশা উত্তৰাখণ্ডৰ মুখ্যমন্ত্ৰী তিৰথ সিং ৰাৱাটে পদত্যাগ কৰিলে। তেওঁ চাৰি মাহো মুখ্যমন্ত্ৰী হিচাপে কাৰ্যকাল সম্পূৰ্ণ কৰিব নোৱাৰিলে।

শুকুৰবাৰে নিশা ৰাজভৱনলৈ গৈ তাত ৰাজ্যপাল বেবী ৰাণী মৌৰ্যৰ হাতত নিজৰ পদত্যাগ পত্ৰ দাখিল কৰে।

যোৱা ১০ মাৰ্চত তেওঁ ত্ৰিবেন্দ্ৰ সিং ৰাৱাটৰ সলনি উত্তৰাখণ্ডৰ মুখ্যমন্ত্ৰীৰ আসনত বহিছিল।

জানিব পৰা মতে, শনিবাৰে দুপৰীয়া ৩বজাত ৰাজ্যিক বিজেপিৰ মুখ্য কাৰ্যালয়ত বিধায়িনী দলৰ বৈঠক আহ্বান কৰা হৈছে আৰু তাতেই ৰাজ্যখনৰ পৰৱৰ্তী মুখ্যমন্ত্ৰী নাম ঘোষণা কৰা হ’ব।

কেন্দ্ৰীয় পৰ্যবেক্ষক হিচাপে নৰেন্দ্ৰ সিং তোমৰক ৰাজ্যখনলৈ প্ৰেৰণ কৰা হৈছে।

বাতৰি অনুসৰি, পৰ্যটন মন্ত্ৰী সতপাল মহাৰাজ, উচ্চ শিক্ষা বিভাগৰ মন্ত্ৰী ধন সিং ৰাৱাটকে ধৰি কমেও চাৰিগৰাকী মুখ্যমন্ত্ৰী পদৰ দাবীদাৰ আছে।

অহা বছৰ মাৰ্চ মাহত উত্তৰাখম্ড বিধানসভাৰ ম্যাদ উকলিব। হাতত মাত্ৰ কেইমাহ সময় থকা অৱস্থাত বিজেপিৰ হাতত থকা ৫৬গৰাকী বিধায়কৰ মাজৰ পৰাই নতুন মুখ্যমন্ত্ৰী নিৰ্বাচিত হোৱাৰ সম্ভাৱনা আছে।

কিয়নো কংগ্ৰেছৰ পৰা অহা নেতাৰ ওপৰত ভৰসা কৰি ৰাজ্যখনত ভৱিষ্যতে বিজেপিৰ স্থিতি দুৰ্বল কৰিব নিবিচাৰে হাইকমাণ্ডে।

আনহাতে, কৰ’না ভাইৰাছৰ বৰ্তমান পৰিস্থিতিত উপ নিৰ্বাচন পতাৰ পক্ষত নাই নিৰ্বাচন আয়োগ। তিৰথ সিং ৰাৱাটৰ ক্ষেত্ৰতো একে সমস্যাৰ উদ্ভৱ হৈছিল।

ত্ৰিবেন্দ্ৰ সিং ৰাৱাটৰ সলনি পাউৰি গাৰোৱালৰ সাংসদ তিৰথক বিজেপিয়ে মুখ্যমন্ত্ৰীৰ আসনত বহুৱাইছিল। নিয়ম মতে ছ’মাহৰ ভিতৰত তেওঁক কোনো বিধানসভা আসনত বিজয়ী কৰাই আনিব লাগে। এই সময়ৰ ম্যাদ অহা ১০ছেপ্টেম্বৰত অন্ত পৰিলেহেঁতেন।

কিন্তু ৰাজ্যখনৰ মুখ্যমন্ত্ৰী বা বিজেপিৰ ফালৰ পৰা তেনে কোনো প্ৰচেষ্টা চলোৱাই নহ’ল। স্বাভাৱিকতে বিজেপিয়ে তিৰথক মুখ্যমন্ত্ৰী ৰাখিব বিচৰা নাছিল বাবেই তেনে কোনো প্ৰচেষ্টা নল’লে বুলি ভৱাৰ থল আছে।

ইপিনে কংগ্ৰেছে এই সন্দৰ্ভত প্ৰতিক্ৰিয়া প্ৰকাশ কৰি কয় যে বিজেপি নেতাৰ স্বাৰ্থত উত্তৰাখণ্ডৰ ভৱিষ্যতক লৈ অনিশ্চয়তাৰ সৃষ্টি হৈছে। বিজেপিয়ে ৰাজ্যৰ উন্নয়নৰ কথা কেতিয়াও নাভাৱে। তেওঁলোকে কেৱল মাত্ৰ যিকোনো মূল্যৰ বিনিময়ত ক্ষমতা ধৰি ৰাখিব বিচাৰে।