নৰ্থ ইষ্ট নাওৰ বাতৰি প্ৰভাৱ: কৃত্ৰিম বানত ক্ষতিগ্ৰস্ত পৰিয়ালৰ কাষত উপস্থিত কলিয়াবৰৰ মহকুমাধিপতি

“কলিয়াবৰত কৃত্ৰিম বানপানী” শীৰ্ষক শিৰোনামৰে দেওবাৰে ‘নৰ্থইষ্ট নাও’ত এক বাতৰি প্ৰকাশিত হৈছিল। ইয়াৰ পিছতে কৃত্ৰিম বানত ক্ষতিগ্ৰস্ত পৰিয়ালৰ কাষত আজি উপস্থিত হয় কলিয়াবৰ মহকুমাৰ মহকুমাধিপতি পৱিত্ৰ কুমাৰ দাস।

বাতৰি প্ৰকাশ পোৱাৰ পিছতে এইদৰে দৰিদ্ৰ পৰিয়ালৰ কাষত ঠিয় দিলে কলিয়াবৰ মহকুমাটোৰৰ মহকুমাধিপতিগৰাকী।

চাৰিলেনযুক্ত পথ নিৰ্মাণ কোম্পানীৰ বিষয়ববীয়াক মাতি কেমেৰাৰ সন্মুখতে ড্ৰেইন নিৰ্মাণৰ নিৰ্দেশো দিয়ে মহকুমাধিপতি গৰাকীয়ে।

উল্লেখ্য যে চাৰিলেনযুক্ত পথ নিৰ্মাণৰ বিসংগতিৰ বাবেই  কৃত্ৰিম বানপানী হৈছিল কলিয়াবৰ তিনিআলিত। পানীৰ মাজত আবদ্ধ হৈ আছিল কেইবাটাও পৰিয়ালৰ লগতে এগৰাকী অসহায় মহিলাও।

নেৰা নেপেৰা বৰষুণৰ ফলত নৱনিৰ্মিত পথৰ ওপৰেদি বৈ যোৱা পানীয়ে সৃষ্টি কৰিছিল এনে কৃত্ৰিম বানৰ। যাৰ ফলত কৃত্ৰিম বানৰ মাজত আৱদ্ধ অসহায় মহিলাগৰাকীয়ে কান্দি কান্দি মুখ্যমন্ত্ৰী হিমন্ত বিশ্ব শৰ্মাৰ পৰা বিচাৰিছিল সহায়ৰ হাত।

দেওবাৰে বানত আৱদ্ধ পৰিয়াল কেইটাৰ লগতে মহিলাগৰাকীৰ বাতৰি সবিস্তাৰে পৰিবেশন হৈছিল নৰ্থ ইষ্ট নাওত।

ইয়াৰ পিছতে উক্ত বিষয়টো গুৰুত্ব সহকাৰে লৈ মহকুমাধিপতি পৱিত্ৰ কুমাৰে দাসে মহিলাগৰাকীক খাদ্য বস্তু যোগান ধৰাৰ লগতে জমা হৈ থকা পানীখিনি সিঁচি দিয়াৰ প্ৰতিশ্ৰুতি দিয়ে।

মহকুমাধিপতিগৰাকীৰ তাৎক্ষনিক পদক্ষেপত এতিয়া সন্তোষ প্ৰকাশ কৰিছে স্থানীয় ৰাইজে।