কোচ ৰাজবংশীৰ জনজাতিকৰণৰ দাবীত ৬ আগষ্টত গুৱাহাটী কঁপাব আক্ৰাছুৱে

কোচ ৰাজবংশী জনগোষ্ঠীৰ জনজাতিকৰণ আৰু কমতাপুৰ ৰাজ্য পুনৰ গঠনৰ সমস্যা সমাধানৰ নামত বাৰে বাৰে চৰকাৰে প্ৰতাৰণা আৰু প্ৰৱঞ্চনা কৰি অহাত ক্ষুদ্ধ হৈ পৰিছে আক্ৰাছু ৷

চৰকাৰৰ এনে বঞ্চনাৰ প্ৰতিবাদত সংগঠনটোৱে অহা ২৯ জুলাইৰ প্ৰতিষ্ঠা দিৱসৰ দিনা এই দীৰ্ঘদিনীয়া দাবীত ভাৰতৰ প্ৰধানমন্ত্ৰী ,কেন্দ্ৰীয় গৃহমন্ত্ৰী আৰু অসমৰ মুখ্যমন্ত্ৰীলৈ তেজেৰে লিখা পত্ৰ প্ৰেৰণ কৰিব কৰিব বুলি  সংগঠনটোৰ সভাপতি অৰুণ কুমাৰ  ৰায় আৰু ভাৰপ্ৰাপ্ত সাধাৰণ সম্পাদক কেশৱ ৰায়ে  উল্লেখ কৰিছে ৷

সংগঠনটোৰ কেন্দ্ৰীয় সমিতিৰ সভাপতি অৰুণ কুমাৰ ৰায়ৰ সভাপতিত্বত অনুষ্ঠিত বৰ্ধিত কাৰ্যনিৰ্বাহক সভাত কোচ ৰাজবংশী জনগোষ্ঠীৰ বিভিন্ন জলন্ত সমস্যাসমূহৰ লগতে জনজাতিকৰণ আৰু পৃথক কমতাপুৰ ৰাজ্য পুনৰ গঠনৰ দাবীৰ ওপৰত আলোচনা কৰে ৷

চলিত অসম বিধান সভাৰ প্ৰশ্নোত্তৰ কালত ভৈয়াম জনজাতি আৰু অন্যান্য পিছপৰা শ্ৰেণী কল্যাণ বিভাগৰ মন্ত্ৰী ডাঃ ৰণোজ পেগুই কোচ ৰাজবংশী জনগোষ্ঠীকে ধৰি ছয় জনগোষ্ঠীৰ জনজাতিকৰণ সম্পৰ্কত দিয়া মন্তব্য বা স্পষ্টিকৰণ সম্পৰ্কত সভাত আক্ৰাছুই ক্ষোভ প্ৰকাশ কৰে ৷

অসম বিধান সভাৰ বাজেট অধিৱেশন চলি থকাৰ সময়তে অহা ছয় আগষ্টত গুৱাহাটীত তিনি ঘণ্টীয়া ধৰ্ণা কাৰ্যসূচী ৰূপায়ণ কৰিব ৷

ইয়াৰ পিছতো যদি চৰকাৰে কমতাপুৰ ৰাজ্য পুনৰ গঠন আৰু জনজাতিকৰণৰ ক্ষেত্ৰত সঠিক পদক্ষেপ গ্ৰহণ নকৰে তেতিয়াহলে আক্ৰাছুৱে তীব্ৰ আন্দোলনৰ কাৰ্যসূচী ল’বলৈ বাধ্য হ’ব বুলি উল্লেখ কৰিছে ৷