নেশ্যনেল লিবাৰেচন ফ্ৰণ্ট অৱ ত্ৰিপুৰা(পি ডি) ৰ তিনি সদস্যৰ আত্মসমৰ্পণ

ত্ৰিপুৰাত নিষিদ্ধ ঘোষিত নেশ্যনেল লিবাৰেচন ফ্ৰণ্ট অৱ ত্ৰিপুৰা (এন এল এফ টি)ৰ পৰিমল দেৱবৰ্মা গোটৰ তিনিজন সদস্যই বুধবাৰে বাংলাদেশ শিবিৰৰ পৰা পলাই আহি ত্ৰিপুৰা আৰক্ষীৰ ওচৰত আত্ম সমৰ্পণ কৰে।
আত্ম সমৰ্পণৰ সময়ত উগ্ৰপন্থী কেইজনৰ পৰা এটা .২২ কেলিবাৰ পিষ্টল সহ চাৰি-পাঁচ ৰাউণ্ডৰ গুলি আৰক্ষীয়ে উদ্ধাৰ কৰে।

আত্ম সমৰ্পণকাৰী উগ্ৰপন্থী কেইজন ক্ৰমে – অলীন্দ্ৰ ৰিয়াং(২৫) উৰফে বেচিং আৰু ছুজিৎফা, অনিদা ৰিয়াং(৩৬) উৰফে য়াফুং আৰু মনতাজয়ী, আৰু ড্ৰা কুমাৰ ৰিয়াং(৩০) উৰফে দুনিয়া আৰু মিলিকা।

উল্লেখযোগ্য যে তিনিওজনে অন্যান্য চৰমপন্থী সকলৰ সৈতে ২০১৯ চনত এন.এল.এফ.টিৰ পৰিমল দেৱবৰ্মাৰ বাংলাদেশ শিবিৰত যোগদান কৰে বুলি প্ৰাৰম্ভিক অনুসন্ধানত ফাদিল হয়।
তেওঁলোকে উপলব্ধি কৰে যে তেওঁলোক ‘স্বতন্ত্ৰ ত্ৰিপুৰা’ৰ নামত প্ৰতাৰিত হৈ বিদ্ৰোহী সংগঠনটোত যোগদান কৰিছিল ।

ঘৰৰ পৰা বাহিৰত থকা সময়ছোৱাত তেওঁলোকে শাৰীৰিক মানসিক যন্ত্ৰনা সহন কৰিছিল বুলি তেওঁলোকে জানিবলৈ দিছে।সম্প্ৰতি এন.এল.এফ.টিৰ পৰিমল দেৱবৰ্মা গোটে গভীৰ অৰ্থনৈতিক আৰু সাংগঠনিক বিপৰ্যয়ৰ মুখামুখি হৈছে।
আনহাতে বুধবাৰে ত্ৰিপুৰা আৰক্ষীয়ে প‌্ৰেচ বিজ্ঞপ্তিৰ জৰিয়তে জানিবলৈ দিয়ে যে ত্ৰিপুৰা আৰক্ষীৰ দ্বাৰা পৰিকল্পিত আৰু সংগঠিত প্ৰচেষ্টাৰে সমাজৰ মূল সূঁতি ৰ সৈতে সংযুক্ত হ’বলৈ তেওঁলোকক অনুপ্ৰাণিত কৰি অহা হৈছে।
উল্লেখযোগ্য যে, ১২ মাৰ্চ ২০১২ তাৰিখে এই নিষিদ্ধ সংগঠনটোৰ নেতা পৰিমল দেৱবৰ্মাক মিজোৰামৰ আইজল আৰক্ষীয়ে আটক কৰিছিল । পিছত ১৪ মাৰ্চ ২০২১ তাৰিখে দেৱবৰ্মাক আগৰতলা লৈ স্থানান্তৰিত কৰা হয়।