আমেৰিকাত পুনৰ বন্দুকধাৰীৰ তাণ্ডৱ; এইবাৰ স্কুলত প্ৰৱেশ কৰি অধ্যক্ষক গুলীয়ালে প্ৰাক্তন ছাত্ৰই

আমেৰিকাত পুনৰ বন্দুকধাৰীয়ে চলালে তাণ্ডৱ। এইবাৰ স্কুলত প্ৰৱেশ কৰি প্ৰাক্তন ছাত্ৰই চলালে নিৰ্বিচাৰে গুলী। অৱশ্যে কোনো শিক্ষাৰ্থী হতাহত হোৱাৰ খৱৰ পোৱা হোৱা নাই যদিও গুৰুতৰভাৱে আহত হৈছে স্কুলৰ অধ্যক্ষগৰাকী।

দেশখনৰ আৰক্ষীয়ে ইতিমধ্যে আততায়ীক গ্ৰেপ্তাৰ কৰিবলৈ সক্ষম হৈছে।

টেক্সাছৰ হিউষ্টন স্কুলত সংঘটিত এই ঘটনাই তীব্ৰ চাঞ্চল্যৰ সৃষ্টি কৰে। শিক্ষাৰ্থীসকলৰ মাজতো আতংকই বিয়পি পৰে। অভিভাৱকসকলো শংকিত হৈ পৰিছে আৰু দেশখনৰ বন্দুক নীতিকলৈয়ো প্ৰশ্ন উত্থাপিত হৈছে।

বাতৰি অনুসৰি, শুকুৰবাৰে বিয়লি হাতত বন্দুক লৈ হঠাতে হিউষ্টনৰ ইয়েছ প্ৰেপ ছাউথৱেষ্ট ছেকেণ্ডাৰি স্কুলত আততায়ীজন সোমাই পৰে।

প্ৰৱেশ কৰিয়েই অধ্যক্ষৰ কাষৰ ৰুমতে গুলী চলাই থকা শুনি শিক্ষাৰ্থীসকলৰ কথা চিন্তা কৰি অধ্যক্ষগৰাকী ওলাই অহাত তেওঁৰ পিঠিত গুলী লাগে।

গুৰুতৰভাৱে আহত অধ্যক্ষগৰাকীক হাস্পাতালত ভৰ্তি কৰোৱা হয়। আৰক্ষীয়ে আততায়ীক বিচাৰি তীব্ৰ অভিযান চলাই আৰু অৱশেষত আটক কৰে।

বাতৰি মতে ২৫বছৰীয়া এই আততায়ী ইয়েছ প্ৰেপ ছাউথৱেষ্ট ছেকেণ্ডাৰি স্কুলৰে প্ৰাক্তন ছাত্ৰ। আৰক্ষীয়ে কি কাৰণত প্ৰাক্তন ছাত্ৰজনে গুলী চলাইছিল সেয়া জানিবলৈ জেৰা অব্যাহত ৰাখিছে।