ৰাষ্ট্ৰসংঘত পাকিস্তানক তুলা-ধুনা ভাৰতীয় প্ৰতিনিধি কাজল ভাটৰ

ভাৰতে পাকিস্তানৰ পৰা উদ্ভৱ হোৱা সীমান্তপাৰ সন্ত্ৰাসবাদৰ বিৰুদ্ধে দৃঢ় আৰু নিৰ্ণায়ক ব্যৱস্থা গ্ৰহণ কৰি যাব। ৰাষ্ট্ৰসংঘত এইদৰে দৃঢ় স্থিতি স্পষ্ট কৰে ভাৰতক প্ৰতিনিধিত্ব কৰা কাজল ভাটে।

“ভাৰতে পাকিস্তানকে ধৰি সকলো দেশৰ সৈতে স্বাভাৱিক চুবুৰীয়া সম্পৰ্ক বিচাৰে আৰু চিমলা চুক্তি আৰু লাহোৰ ঘোষণা অনুসৰি দ্বিপাক্ষিক আৰু শান্তিপূৰ্ণভাৱে সমস্যা সমাধানৰ বাবে প্ৰতিশ্ৰুতিবদ্ধ।” ৰাষ্ট্ৰসংঘত ভাৰতৰ স্থায়ী মিছনৰ পৰামৰ্শদাতা কাজল ভাটে ৰাষ্ট্ৰসংঘৰ নিৰাপত্তা পৰিষদত কয়।

অৱশ্যে যিকোনো অৰ্থপূৰ্ণ আলোচনা কেৱল সন্ত্ৰাস, শত্ৰুতা আৰু হিংসামুক্ত পৰিৱেশত হে অনুষ্ঠিত কৰিব পাৰি বুলি উল্লেখ কৰি ভাটে কয়, “এনে এক অনুকূল পৰিৱেশ সৃষ্টি কৰাৰ দায়িত্ব পাকিস্তানৰ ওপৰত। তেতিয়ালৈকে ভাৰতে সীমান্তৰ ইপাৰৰ সন্ত্ৰাসবাদৰ বিৰুদ্ধে দৃঢ় আৰু নিৰ্ণায়ক পদক্ষেপ গ্ৰহণ কৰি থাকিব।”

ইছলামাবাদে ১৫ ৰাষ্ট্ৰৰ পৰিষদত কাশ্মীৰ সমস্যা উত্থাপন কৰাৰ পিছত ভাৰতে কালি ৰাষ্ট্ৰসংঘৰ নিৰাপত্তা পৰিষদত এইদৰে পাকিস্তানক প্ৰত্যুত্তৰ দিয়ে।

“এইয়া প্ৰথম বাৰৰ বাবে নহয় যে পাকিস্তানৰ প্ৰতিনিধিয়ে ভাৰতৰ বিৰুদ্ধে মিছা আৰু বিদ্বেষপূৰ্ণ প্ৰচাৰৰ বাবে ৰাষ্ট্ৰসংঘৰ দ্বাৰা প্ৰদান কৰা মঞ্চৰ অপব্যৱহাৰ কৰিছে আৰু বিশ্বৰ মনোযোগ পাকিস্তানৰ বিধ্বস্ত অৱস্থাৰ পৰা আঁতৰাই নিবলৈ বৃথা চেষ্টা কৰিছে, যিখন দেশত সন্ত্ৰাসবাদীয়ে মুক্ত জীৱন উপভোগ কৰে; আনহাতে সাধাৰণ মানুহৰ জীৱন, বিশেষকৈ সংখ্যালঘু সম্প্ৰদায়ৰ লোকসকলৰ জীৱন দৰ্দশাগ্ৰস্ত হৈ পৰে। ” ভাটে লগতে কয়।

ৰাষ্ট্ৰসংঘত পাকিস্তানৰ ৰাষ্ট্ৰদূত মুনিৰ আক্ৰামে ‘প্ৰতিৰোধমূলক কূটনীতিৰ জৰিয়তে আন্তৰ্জাতিক শান্তি আৰু নিৰাপত্তা বজাই ৰখা’’ সন্দৰ্ভত মুকলি বিতৰ্কৰ সময়ত ৰাষ্ট্ৰসংঘৰ নিৰাপত্তা পৰিষদত জম্মু-কাশ্মীৰ সমস্যা উত্থাপন কৰাৰ পিছত শ্ৰীমতী ভাটে এই প্ৰত্যুত্তৰ জনায়।

ভাটে তেওঁৰ মন্তব্যত কয় যে ৰাষ্ট্ৰসংঘৰ সদস্য ৰাষ্ট্ৰসমূহৰ অৱগত যে পাকিস্তানে সন্ত্ৰাসবাদীসকলক আশ্ৰয় দিয়া, সহায় কৰা আৰু সক্ৰিয়ভাৱে সমৰ্থন কৰাৰ এক প্ৰতিষ্ঠিত ইতিহাস আৰু নীতি আছে।

ভাটে লগতে কয়, “পাকিস্তান এনে এখন দেশ, যিখন দেশক ৰাজ্যিক নীতিৰ বিষয় হিচাপে সন্ত্ৰাসবাদীসকলক মুকলিকৈ সমৰ্থন, প্ৰশিক্ষণ, বিত্তীয় যোগান আৰু সশস্ত্ৰ কৰা দেশ হিচাপে বিশ্বব্যাপী স্বীকৃতি দিয়া হৈছে। ই ৰাষ্ট্ৰসংঘৰ নিৰাপত্তা পৰিষদৰ দ্বাৰা সৰ্বাধিক সংখ্যক সন্ত্ৰাসবাদীক আতিথ্য দিয়াৰ দুৰ্লভ অভিলেখ ৰচিছে।”

ভাৰতৰ স্থিতি স্পষ্টভাৱে উল্লেখ কৰি তেওঁ কয় যে জম্মু-কাশ্মীৰ আৰু লাডাখৰ সমগ্ৰ কেন্দ্ৰীয় শাসিত অঞ্চলসমূহ ভাৰতৰ এক অবিচ্ছেদ্য অংগ আছিল আৰু থাকিব।

তদুপৰি ভাৰতে পাকিস্তানক ইয়াৰ অবৈধ দখলৰ অধীনৰ সকলো অঞ্চল তৎক্ষণাৎ খালী কৰিবলৈ আহ্বান জনায়।