পঞ্চায়তৰ ৰণডংকা বজালে অগপই; ৫০ হাজাৰ বুথ কৰ্মীৰ উপস্থিতিৰে অগপৰ বুথ সন্মিলন

পঞ্চায়ত নিৰ্বাচনৰ প্ৰাক মূহুৰ্তত ৰাজনৈতিক দলসমূহে নিজৰ নিজৰ শক্তি প্রদর্শনত নামি পৰিছে । অগপও এইক্ষেত্ৰত পিছ হুহকি ৰোৱা নাই। আজি খানাপাৰাৰ পশু চিকিৎসা মহাবিদ্যালয় খেলপথাৰত প্ৰায় ৫০,০০০০ কৰ্মীৰ উপস্থিতৰে আৰম্ভ হৈছে অগপৰ বুথ পৰ্য্যায়ৰ কৰ্মী সন্মিলন।

আজিৰ এই সভাত অগপই পঞ্চায়ত নিৰ্বাচনত অকলেই প্ৰতিদ্বন্দিতা কৰিব বুলি ঘোষণা কৰি ৰমেন্দ্ৰ নাৰায়ণ কলিতাই আদৰণি ভাষণত কয়, ‘বৰ্তমানো দলটোৰ শক্তি কমা নায়। বুথ কৰ্মী সন্মিলনে অগপৰ শক্তি প্ৰমান কৰিছে।’

আনহাতে জাতীয় স্বাৰ্থ ৰক্ষাৰ বাবে মিত্ৰজোঁট এৰিবলৈ প্ৰস্তুত বুলি উল্লেখ কৰি তেওঁ নাগৰিকত্ব সংশোধনী বিধেয়ক গ্ৰহণ কৰিলে অগপই মিত্ৰজোঁট এৰিব বুলি মন্তব্য কৰে। তেওঁ আৰু কয় যদিহে ‘জাতীয় সমস্যা সমাধান নকৰে মিত্ৰজোঁটক সমৰ্থন নজনাই অগপই।’

ইয়াৰ পূৰ্বে আয়োজিত স্মৃতি তৰ্পণ অনুষ্ঠানত অংশগ্ৰহণ কৰে অগপৰ সভাপতি অতুল বৰাই। তেওঁক সহযোগ কৰে অগপৰ প্ৰাক্তন সভাপতি প্ৰফুল্ল কুমাৰ মহন্ত আৰু কাৰ্য্যকৰী সভাপতি কেশব মহন্তই।

সভাপতি অতুল বৰাৰ সভাপতিত্বত চলি থকা কৰ্মী সন্মিলনখনৰ মূল সভাত প্ৰফুল্ল কুমাৰ মহন্ত, কেশব মহন্ত, গুণীন হাজৰিকা, ৰমেন্দ্ৰ নাৰায়ণ কলিতা, বৃন্দাবন গোস্বামী, সত্যব্ৰত কলিতা, ফনিভূষণ চৌধুৰীকে প্ৰায় সকলো শীৰ্ষ নেতৃত্ব উপস্থিত আছে।